Gastpost von Andrea: New York

Hallo mitenand

Nochdem ich am obet am 7ni endlich am Flughafe vo New York acho bin hani dur d Passkontrolle möse schliche. Ganzi 2 h hani möse astoh und warte bisi endlich mol min Pass han chöne zeige. Ab den isches echli besser gange. S Gepäck hani schnell gfunde und bin mit es paar andere Aupairs woni im Flugi troffe han use zum Fahrer gange wo üs abholt. Doch im Bus hämer nomol e Ewigkeit dörfe warte wil mer no es paar anderi Lüüt vomene andere Flug erwartet hend. Denn simer komplett gsi und sofort losbrauset dur Qeens noch Long Island ufem holprige, schlaglöchrige Highway. Ufem Campusgländ vode St.Johns University simer den so ca. am 12i acho und hend nochere meh oder weniger churze Information vode Organisatore üsi Zimmer dörfe bezüche. Denn hend sich di meiste Aupairs im Ufenthaltsruum troffe, zeme Pizza gesse und viel pläuderlet. I bin den ide Nacht am 2 endlich go pfuse und han am halbi 7ni schowieder möse ufstoh zum go zmörgele. Und am 8i isches mitem Unterricht losgange. Mir hend vil glernt über d Mentalität vode Amis, eri Gsetz, das d Chind ca 30mol am Tag mönd Hend wäsche, was guet isch zum esse, weli Sache das d Chind nöd id Finger übercho dörfed, en CPR Kurs, und und und. Es paar vode Mädels sind ufgrund Schlofmangel ide Klass igschlofe. I han mich gad eso chöne hebe... ;-) Am erste Tag hemer nume bis am 6i Schuel gha doch de zweiti Tag isch mega heavy gsi und mir hend bis am viertelab 9ni hinder üse Bänk möse hocke.

Am dritte Tag isch d Schuel bis am 2 gange und denn simer am Nomi mit zwei Büs richtig Manhatten abdüset. 2h lang het d Fahrt ufem Holperhighway bis zude groosse Stadt duuret und denn simer mitere grandiose Bus Tour durch New York City für üsi Geduld belohnt worde. Tour het bim Rockefellercenter gendet und uf das Gebäude simer den au ufe go luege wie denn d Ussischt vo döte obe isch. I chan nume sege es het sich glohnt! Nochem grosse Wolkechrazer hemer d Stadt inere Stund uf eigete Füess erkundet, imene MacDonalds gesse und üs denn am 9ni mitem Reste vode Aupairs bim Empire State Building troffe zum wieder zrug noch Long Island zfahre und sletschte mol ufem Campus schlofe.

Am Fritig morge hemer alli üsi siebe Sache zemepakt und sind am 9ni id Büs igstige wo üs zude Flughäfe fahret. Nochere witere 1.5h Fahrt simer den am John F. Kenedy abgsetzt worde und hend üses Gepäck icheckt. Und denn isch di gross Warterei erscht losgange, wil min Flug erscht am 5i am Obet planet gsi isch. Das bedütet dasi mitere Kollegin 6h im Flughafe umenand ghanget bin und eifach druf gwartet han dases endlich 5i werd. Wos endlich sowit gsi isch simer gschwind in Flugi igstige und hend döte us unerklärliche Gründ nomol e Stund dörfe warte bis de Vogel endlich ide Luft gsi isch. Nocheme 6.5 stündige, turbulenzeriche Flug bini denn endlich am Flughafe vo Oakland (San Francisco) acho und vo minere Host Family sehr fründlich empfange worde. Bi ene dihei in Piedmont bini denn nochere Husfüehrig bald emol i mis neue Bettli ghuschet und han de grösti Teil vom Wucheend durepfuuset.

Liebs Grüässli Andrea