Berlin, Berlin

Als nöchschts gangi für äs paar Täg im Februar uf Berlin. Flügär isch buächt, ä Feriäwohnig für 72.- (+ 50.-) für 5 Nächt hämmär au, jetzt chönts aigäntli losgoh... :-)

Größere Kartenansicht

dihai

Diä 4 Wuchä Feriä zFrankrich sind laidär scho wiedär värbi. I bi jetzt beraits sitärä Wuchä dihai. Zum Glück ischäs di ganz Wuchä schös Wättär gsi, so dass dUmstellig nöd allzu schlimm gsi isch. Trotzdem häts än Temparaturschock vo ca. 10 Grad geh. Abär wiä gsait: dSunnä isch zum Glück no chli blibä. Jetzt isch dä Uni- und Arbätsalltag wiedär losgangä und i denkä mir scho wiedär us, wos mi als nöchschts hivärschloht...

sletscht Mol Antibes

Hüt simmär sletscht Mol in Antibes gsi. Statt normal Schuäl hämmär än Usflug id Altstatd gmacht. Döt hämmär nomol bitzäli alläs agluägät und sind denn gmüätlich inäs Kaffi go zmörgälä. Tja, und jetzt sind diä Feriä laidär au scho fascht wiedär umä...

Cap d'Antibes

Am Sunntig simmär am Cap d'Antibes go sünnälä. Das isch, wiä dä Namä scho sait, äs Kapp wo rächt wiit is Meer usägoht. Zum ganz rundumä laufä brüchtmär mehreri Stund. Mir sind jetzt quer durä gangä zum anä chlini värsteckti Bucht zcho und händ döt dä ganz Tag gsünnälät. SKapp isch rächt schön. Äs hät nöd so viel Lüt döt usssä, däfür häts abär au kain Staistrand. Ufäm Wäg döt anä, hämmär lutär värsteckti Luxusvillänä entdeckt, wommär allärdings nöd ganz gseht. I denä wohnäd (odär zumindäst idä Feriä) berüähmti Lüti vom Johnny Depp bis zum Abramovic.Diä hämmär abär laidär nöd gseh ;-)

Parfüm

Hüt bini zGrasse gsi. Aigäntli gits döt nöd so viel zentdeckä ussärt ä härzigs chlisäs Städtli und Parfümeriä. Grasse hät sich beraits im 17. Jahrhundärt scho än Namä idä Parfümhärstellig gmacht und gilt hüt no als "Welthauptstadt des Parfüms" (Das Parfüm spielt au döt). Drum sind mir nöd numä go sStädtli aluägä, sondärn händ grad üsäs aigäts Parfüm ärstellt. Das ganzä bestoht usärä Basis-, ä Härz- und änärä Chopfnotä wo untärschidlich lang ahebäd. I han hüt also bsundärs viel müäsä schnuppärä zum usäfindä, was mir gfallt, damitis nochär wiä imänä Chemielabor han chönä zemämischä. SParfüm isch mega fain wordä. Laidär muäni jetzt no mindästäns 10 Täg wartä, bis sich diä Essenzä richtig gfundä hend und i sParfüm bruchä chan.

Rägä?!?

Oh nai, äs isch doch no passiert, äs hät gescht Nacht grägnät :-S Und nöd numä aifach grägnät: Äs isch richtig Wältuntärgangsstimmig gsi. Vom Balkon ob mir isch än richtigä Wassärfall cho, äs hät donnärät und blitzt als öbs grad übär üs gsi wär und dPalmä händ sich wäg äm Sturm bis fascht an Bodä abä bügt. Ä Wundär, dass diä am nöchschtä Tag no gstandä sind. Dä Schuälwäg gescht Morgä hät denn au dementsprächänd usgseh: Übärall sind Blättär am Bodä glägä und dStrossä sind immär no tails übärschwemmt gsi. I mim Zimmär isch zum Glück trochä blibä, abär mini Nochbürin hät ä riisä Wassärlachä ufäm ganzä Zimmärbodä gha, will dBalkontürä nöd dicht gsi isch. Naja, gescht Nomi hät denn abär au scho wiedär dSunnä gschunä und hüt Nomittag bini bereits wiedär am Strand am Sünnälä gsi.

Sunnäufgang in Monaco, Sunnäuntärgang in Nizza

Dos diä Wuchä irgändwiä nöd mitäm Internet klappät hät (und dä Tino bi mir gsi isch ;-) ), chunt halt ersch jetzt wiedär än Biitrag zu dä letschtä Wuchä. Churz gsait; viiiiel Sunnä, Boot fahrä, Monaco by night und Nizza bi Tag.

Am Mentig hani entli wiedär dä Tino gseh. DHifahrt zum Flughafä isch allärdings chli kompliziärtär gsi. Aigäntli sött all Virtälstund än Bus fahrä. Irgändwenn isch denn au mol ainä uftaucht, zum Flughafä häts denn aber no übär ä Stund durät, obwohl adä Taflä ungefähr 20 - 25 min gstandä sind. Hans denn abär glich no gschafft. Am Zischtig hät denn dSchwiizär Truppä zviertä äs Böötli gmiätät. Da hät sich zwor mega glohnt, isch abär au mega chalt gsi, wennmär gfahrä sind wägäm Wind und äm Wassär wo gsprützt hät.

Am Donnschtig Obäd simmär denn Monaco go aluägä. Aigätntli hämmär welä inän Club, dä hät abär scho zuä gha, wills nümä Saison isch. Drum simmär halt churzärhand Monaco idä Nacht go aluägä (riiisigä Yachtä) und händ drum au dä Sunnäufgang gseh. Am Samschtig hämmär denn Nizza bsuächt. I glaub so viel gloffä bini no niä i mim Läbä. Abär säb hät sich glohnt, Nizza isch aifach mega schön. Sainzig wa chli blöd isch, dassäs kain Sandstrand sondern numä ain mit Chiesäl hät.
Tja, und das wärs au scho wiedär vo därä Wuchä. Morn muän dä Tino laidär scho wiedär wiitär uf London und denn sinds für mi nur no 2 Wuchä bis mini Feriä au scho wiedär värbi sind.

1 Wuchä

Jetzt bini beraits scho ai Wuchä idä Schuäl und äs isch immär no schöns Wättär und mega warm :-) Am Wuchäend simmär Cannes go aluägä. Aigäntli gits döt nöd würkli viel zgseh, äs isch aifach mega äs härzigs Städtli. SZenter vodä Stadt bestoht abär im wesentlichä usäm Casino und mega vilnä chlinä Strossä mit aim Ladä nochäm andärä. Würkli Wohnhüsär häts döt nöd würkli. Diä sind eher alli drumumä värtailt. Natürli isch au dä Hafä in Cannes, wiä glaubs adä ganzä Côte d'Azur mit Yachtä vollparkt. I chaufmär glaubs au aini ;-) Sus häts aifach no än mega schönä Usblick ufämnä Hügäl mitärä Chilä. Am Sunntig isch denn Wäsch- und Putztag agsait gsi und natürlich bädälä; abär bru bini immär no nöd. Alli andärä sind uf all Fäll viel brünär. Abär i han jo no fascht drü Wuchä Ziit :-D

chlini Gäscht

Jeeh, nochämnä ganzä Nomittag am Strand liggä, bini endli ächli bru wordä. Wenigstäns für mini Värhältnis... SWettär do isch noch wiä vor mega schön, han mi mindästäns all Halbstund müäsä go abchüälä im Meer.
Dä Strand in Antibes sälbär isch mega schön und numä ca. ä Minutä vodä Schuäl entfärnt. Zudem ischär zum Glück nöd so voll wiä dä in Juan les Pins. Da lit villicht au dra, dassär zimli värsteckt isch. Är lit nämli grad vor dä Muurä vo Antibes.

Äs isch aber immer au mega härzig wennmär zrugg is Castel (dUnterkunft) gönd. Döt wartät nämli sobalds Ziit für Znacht isch zwai chlini Chätzli und wönd au öpis. Laidär sinds mega schüch und lönd sich nöd alangä, trotzdem sitzäz jedä Obäd wiedär do bi üs. DSchuäl isch au rächt luschtig. Hüt hämmär irgändwelchi Lüt mösä go Sachä über Antibes und Umgebig frögä, damitmär chli französisch redäd. Morn gits denn dä erschti Täscht zum Luägä öbmär alläs vo därä Wuchä begriffä händ.

Schuäl

Di erstä 2 Täg sind beraits umä, isch mega schnäll gangä. DSchuäl und dLüüt do sind supär, hans mega luschtig. Laidär isch dä Atail a Dütschsprächändä sehr hoch. Mini Nochburä chömäd abär wenigstäns vo Dubai, so dassi englisch redä chan.
Gescht hämmär als Istig mit allnä Neuä än Usflug dur Antibes und Umgebig mitäm Car und zFuäss gmacht. Laidär hät dävo niämärt öpis gwüsst, so dassi dKamera nöd däbi gha han. DUssichtä wommä nämli tailwiis gha händ, sind aifach dä Hammär gsi. Laidär chuntmär adi maischtä Plätz ohni Auto nöd so schnäll hi, da wär ä Tagäswandärig. Drum gits laidär kai Fötäli :-( Chönds abär ärahnä mit dem Bild usäm Internet wo vom Lüchtturm vo Antibes (woni au gsi bin) gmacht wordä isch.

Fötäli vo Antibes sälbär chömäd no, döt laufi jo jetzt jedä Tag durä wäg dä Schuäl.

acho :-)

Nochämnä sehr churzä und mega schönä Flug mit guätä Ussicht, bini grad vor ä paar Minutä in Antibes acho. Äs isch mega warm do und sMeer hät bim Aflug aifach genial usgseh. SZimmär isch laidär ächli chli, däfür häts ä Doppälbett und voräm Zimmär no än Tisch und Stüähl zum dussä hockä. Für morn isch scho allä klärt; am 9i muäni idä Schuäl si. Jetzt hüpfi no rasch undär dDuschi und luäg nochär mol wiäni zum Strand chumä...

Antibes 2010

Vom 22. August bis am 18. September gohts das Johr uf Antibes adä Côte d'Azur in Frankrich. Nur no äs paar Wuchä... :-)

http://www.planetware.com/picture/antibes-f-f645.htm