Schlössli und Citylauf zFüssen

Letschtä Samstig ischäs asä schös Wättär gsi, da hämmär grad mösä usnutzä. Mir sind uf Füssen gfahrä und händ döt di baidä Schlössli Hohenschwangau und Neuschwanstein agluägät. Zum Glück simmär früäh ufgstandä, mir händ nämli scho 20 min mösä astoh zum Ticket chaufä. Denn hämmär däfür au grad sSchloss Hohenschwangau chönä go aluägä. Ufäm Prospekt stoht, mi heg 20 min bismär ufä glaufä seg, mir sind denn abär scho i 6 min dobä gsi.

Denn isch au scho churz noch dä 11i gsi und mir sind go Zmittag ässä. Chum hämmär üsäs Ässä übärcho, isch am Restaurant dä Strom usgangä. Glück gha! :-) Laidär häts bim Bus und bi dä Kutschä ä riiiiiesigi Schlangä gha, so dassmär halt dä 40 minütig Wäg lut Prospekt zum Schloss Neuschwanstein undär dFüäss gno händ. Allärdings sinds au do zimli dänäbät glägä. Mit Glacépausä hämmär numä 25 min brucht.

Denn hämmär üs uf dä Wäg zum Auto gmacht. Da hämmär allärdings nümä gfundä... Mir händ 3 Parkplätz abgsuächt, abär kainä isch dä richtig gsi. Schlussendli hämmär denn no än viertä ächli versteckt gfundä und döt isch denn au sAuto gstandä. Diä Suächaktion hät üs ächli Ziit kostät. Drum simmär schnäll uf Füssen gfahrä, döt in See inäghüpft, schnäll go sünnälä und denn ab zum aigäntlichä Event vo dem Usflug: Dä Citylauf vo Füssen. I bin serscht Mol i mim Läbä 10 km joggäd und da i brüätändär Hitz vo übär 30 Grad. Abär äs isch alläs supär gloffä. I bi sogar no schnällär gsi als im Training.

DAndrea und dä Tino händ idä Zwüschäziit Saich gmacht und sind go Wassärpistolä chaufä zum mi Abschüssä. 

Zum Abschluss simmär no go chinesisch ässä und dä Halbmarathon luägä und sind denn nochäm Rangvärläsä wiedär haigfahrä.

Gastpost von Andrea: Roadtrips 1/2

Hallo zeme

Jetzte bini wieder dihei ide Schwiiz aber i chan eu jo glich no vo mine Erlebnis ide Staate brichte..  Im erste Halbe Johr bini fliessig gsi und han 7 Roadtrips gmacht i 7 Mönet und debii en huufe neui Lüüt us aller Welt kenneglernt.


Roadtrip 1: Crater Lake, Portland, Mount Rainier National Park, Seattle 4pers,  5 Tage  29.8.13 - 2.9.13
1 Schweiz, 1 Frankreich, 2 China

Min aller erste Roadtrip ide Staate!! D' Emie mitem gäle Tshirt isch s erste Aupair woni in Kalifornie troffe han und mir hend sofort gmerkt dasmer uf de gliche Wellelängi sind. Sie het mich gfroget öbi mit ere uf de Roadtrip noch Portland und Seattle will cho. Sie het scho alles organisiert.. wo das mer durefahred, was das mer gönd go aluege und alles het uf de Fotis so super cool usgseh. Drum hani ere zuegseit dasi mit ere mitchume. Denn hemer ufere Aupair Facebook Gruppe es anders Aupair und uf Couchsurfing eini wo am umereise isch gfunde wo wönd mitcho und denn simer losdüset.

USA isch isch es super guets Land zum umereise. D Landschaft änderet sich ständig. Es werd nie langwilig zum usem Fenster vom Auto useluege. Mir sind duren Wald duregfahre, 10 min spöter hemer en See gse, de See het en huufe Arme gha und je noch dem i weli Richtig das mer zum See glueget hend het de Stei um de See ume e anderi Farb gha. Nochere churze Ziit nochem See hemer en einsame Berg ide Landschaft gseh. Mir glaubet es isch en Vulkan gsi. Und so isches uf all mine Trips gsi.



Roadtrip 2: Lake Tahoe 7pers, 2 Tage 12/13.10.13
2 Schweiz, 1 Frankreich, 2 Italien, 1 Deutschland, 1 Argentinien

Noch de Emie und mim super tolle erste Roadtrip hemer scho bald entschiede das mer nomol en Trip wönd zeme mache. Und was mer beidi uhh gern wönd gseh isch Yosemite national park. So mini talentiert Reiseveranstalterin Emie het en super geniale Roadtrip zemebastlet aber denn isch de Shutdown cho... alli Nationalpärk ide USA sind gruumed worde will die Idiote ide Regierig sich nöd hend chöne einige über es Gsetz. Mir hend es paar Wuche gwartet und hend ghoffed dass de Striit ide Regierig bald fertig isch aber e Wuche vor üsem planete Datum hets all nonig guet usgseh für Yosemite und drum hemer en Plan B (Lake Tahoe) gmacht. Uf Couchsurfing hemer wieder noch es paar Lüüt gsuecht zum s Auto fülle und es hend sich gad mehreri gmolde. mir hend es zweits Auto organisiert das alli 7 Lüüt chönd mitcho. s Interesante a Couchsurfing isch du gosch für es paar Täg mit Lüüt go reise wod nie troffe hesch. Nume mit Kontakt übers Internet und en Blick is online Profil vo dene Leuts hemer üs alli am abgmachte Ort troffe und sind losdüset noch Lake Tahoe. Do hani übrigens bin 2. wilde Bär gseh. Mir sind eifach ade Stross nogfahre und denn het d'Emie gschraue, Bär! Bär! Denn hani sofort uf de Siite vode Stross aghalte und mir sind usem Auto usgstige und hend de schön Schwarzbär vo ca 30m beobachtet.

De Trip mit dene Leuts isch suuper hammer cool gsi. mir hend alli sooo guet zemepasset, hend soo vil glachet gha, und e super Ziit mitenand gha. Nume gad e Wuche spöter hemer üs nomol troffe für en Znacht in San Francisco. und denn sind 3 vo üsere Tahoe Gruppe hei i eres Land gange.


Roadtrip 3: Yosemite 4pers, 2 Tage 26/27.10.13
2Schweiz, 1 Frankreich, 1 Italien

So mite restliche 2 Lüüt vode Lake Tahoe Gruppe (Carmen und Leonardo) hemer gad nomol en Trip gmacht und dasmol entlich noch Yosemite. De Shutown vo de Nationalpärk isch verbii gsi und mir hend sofort üsi Chance pakt und sind losdüset id Yosemite Berge.

Yosemite isch schön aber wenn mo d'Pfäd verloht und en eigete Wäg dur de Wald suecht, isches uhh schön. Mir sind amene Fluss ufem richtige Wäg nogloffe und sind zumene stufewiise Wasserfall cho. Doch vom döte us isch de Wäg in Wald gange und mir hend denkt jo nei jetzte simmer e soo lang dohindere gloffe und das söts scho gsi si mitem Wasserfall. Drum hemer entschide das mer überd Stei ade Fäll nolaufed bises zgföhrlich werd. Das isch e super gueti Entscheidig gsi wil mir hend üses chline Paradies döt hine gfunde und hend fast nüme wele heigo.

Roadtrip 4: Santa Cruz, Monterey, Big Sur 7pers, 2 Tage 16/17.11.13
2 Schweiz, 2 Frankreich, 1 Italien, 1 Holland, 1 Mexiko

Wimer gseht simer denn schlussentlich doch no hei nochem Yosemite. D'Emie het Bsuech übercho vo erere beste Fründin us Frankrich und sie hetere im vorhinein verzellt, sie wür gern öppis vom Land gseh. Do seget d'Emie und i, kei Problem mir machet gad wieder en Roadtrip! Mir als super igspilts Team hend gad wieder Planig id Hend gno. Sie het planet wohi dases söll go und wie de Ziitplan so ungefähr sii söll und i han noch Lüüt gsuecht, Motel und Auto reserviert. Am Obet im Hotel hemer echli Wii drunke und d'Emie isch überstellig worde und isch ufem Bett umeghüpft. Blöderwiis isch sie irgendwie ganz doof vom Bett abegumpet und het sich de Fuess ade Bettkante agschlage. Und wege dem isch de Fuess am nögste Morge recht blau und agschwolle gsi und sie het chum chöne druf stoh. Nochere Gruppe Kriesesitzig hemer usegfunde dases fürd Emie überhaupt nöd i Frog chund zum de Trip abbreche und sie es Päärli Krücke chaufe will zum de Fuess entlaste.

... coming soon, Roadtrip part 2/2...