Gastpost von Andrea: I 35 Täg gohts los!!!

Äs Grüassli vode Andrea  :-)

VIP

Aigäntli hämmär jo wellä mitäm Car in Europapark, abär äs isch wiedär mol ächli andärsch gloffä, alsmärs denkt händ...

Am Donnschtig Morgä, pünktlich am halbi 6i simmär zSt. Gallä am Bahnhof acho. Vomänä Car isch abär wiit und brait nüt zgseh gsi. Däfür simmär vomänä Privatchauffeur begrüässt wordä, wo mit sim Auto döt gstandä isch. Obwohl mir di ainzigä Gäst gsi sind, wo a dem Tag in Europapark händ wellä, hät Eurobus dFahrt nöd aifach abgsait, sondärn hät üs churzärhand im PW uf Rust gfahrä. Supär Service wöri sägä!

Im Europapark ischäs rächt chüäl gsi. Mit Skiundärwösch, warmä Pulli, Wintärjackä, Rägäjackä und -hosä usgrüschtät hämmär abär ainigärmassä warm gha. Däfür hämmär vo Traumastohziitä dörfä profitiärä denn dä Park isch rächt läär gsi. Kai Wundär, zwüschäd Sunnäschi und Schneefall häts alläs geh und Temperaturä händ mit maximal 5 Grad au nöd chönä übärzüügä. Wommär im Summär annärä Bluefire mol schnäll zwai Stund astoht, händ mir innärä knappä Virtälstund anächönä. A vilnä Bahnä hätmär gar nöd mösä astoh. Do ischäs scho mol vorcho, dassmär gfrogät wordä sind, öbmär grad nomol wönd.

Wos denn afangä hät schnaiä, und üs Zibölläli uf dä Silverstar is Gsicht gschlagä sind, simmär denn am spotä Nomittag is Hotel Colosseo. Mir sind bis döt anä eh scho uf allnä Bahnä gsi. Nochämnä fainä Znacht im benochbortä Hotel Bell Rock und ämnä churzä Abstächär id Bar, simmär denn zfriedä igschlofä.

Am nöchschtä Tag häts zwor ächli meh Lüt gha, abär astoh hätmär immär no nöd würkli mösä. Däfür hät sich au fascht dä ganz Tag dSunnä blickä loh. Mir händ drum dä Europapark nomol gnossä, dasmol abär dWassärbahnä usloh. Am Obäd simmär dasmol vom Car abgholt und wiedär sichär zrug brocht wordä.

Was isch jetzt bessär? Schön warmi Temperaturä, däfür Ahstoziitä vo lockär zwai Stundä, odär äs bitzli früürä und däfür alli Bahnä soviel mol fahrä wiämär will, ohni ahzstoh? Mir gönd glaubs snöchschtmol wiedär im März. ;-)