Gastpost von Andrea: Roadtrips 2/2

...Fortsetzig...

Roadtrip 5: Pinnacles 4pers, 2 Tage  23/24.11.13
2 Schweiz, 1 Frankreich, 1 Italien

De Carmen eri Ziit in Californie isch leider langsam z'end gange und drum het sie mitem Dreamteam umdedingt en letschte Trip wele mache. D'Organisation het sie notürlich de Profis, also de Emie und mir überloh. Mir sind als erschts uf Monterey is riisige Aquarium go Fisch, Pinguin, Chrabbe, und unglaublich schöni Qualle go aluege. Gad scho am Iigang hend üs di Agstellte abgfange und de Emie wo immerno mit Krücke umehumplet en Rollstuäl ahbote. Das het di ganzi Sach extrem erliechteret. Mit vil Freud hemer üses Chrüpeli durs Aquarium gstosse und notürlich au selber usprobiert. Noch fast 4h inmitte tuusiger Meeresbewohner simer denn wiitergfahre zumene Hostel ganz ide nöchi vo üsem Hauptziil em Pinnacles National Monument. Döte hemer kochet, sind ewigs lang ufblibe und hend dementsprechend nönd eso früeh us de Federe möge wimer planet gha hend. Mit es bizeli Verspötig hemers denn aber doch no gschafft und hend üs uf de Weg in Park gmacht. Ufem Parkplatz vom Bsuecherzentrum hemer en Ranger gseh winer dTüre vomene Auto versuecht ufbreche wil d Bsitzer de Autoschlüssel stecke loh hend. Mir hend no glachet wi blöd mo doch sii mues das sowas passiert.

Mir hend üs für en sehr eifache Wanderweg entschide wil mer jo d Emie üses Humpelfröschli debii gha hend. Am Afang isch alles super gange und d'Emie isch guet nocho mite Krücke doch ufzmol simer vorem Iigang vonere Höli ohni Liecht oder guet usbaute Gehweg gstande. Wilmer sowiso scho ca 2/3 vom Wg gschafft hend unds au scho spote Nomi gsi isch hemer üs entschide zum üs irgendwie dur die Höhli durekämpfe. De Leonardo het dEmie Huckepack gno und dCarmen und I hend dKrücke ghebet und mit üsene Telefon de Wäg glüchtet. D Lüüt wo üs entgege cho sind hend oftmols nume de Chopf gschüttlet oder üs mit grosse Auge aaglueget. Doch noch ca 30 min simer uf de andere Siite vode Höhli aacho und mitere super schöne Ussicht belohnt worde. Schnell hemer üs uf de Rückweg zum Auto gmacht und hend no e churzi Verpflegigspause iigleit. Ufmzol froget mi de Leonardo öb i eigentlich de Autoschlüssel han. Aber i hanem erklärt das er jo de letscht gsi isch wo öpis bim Auto gmacht het und mir Girls ufen gwartet hend. Er het nomol alli Säck durchsuecht und de Rucksack durwüehlet het aber de Schlüssel nienet gfunde. Au mir Mädels henden nöd bi üs gfunde. Denn sind d Carmen und de Leonardo ufgstande und hend gmeint sie gönd jetzte sofort zum Auto zum luege öbs en döte vergesse hend. I bin im Emie tempo mitem Chrüpeli gmüetlich de Weg wiitergloffe und nochere halb stund sind üs di andere zwei miteme Smile entgegecho. Do isch notürlich gad klar gsi das alles in Ornig isch und de Schlüssel füre cho isch. Nochere churze Erklärig hemer usegfunde das de Schlüssel di ganz Ziit ufem Biifahrersitz gläge isch und sich sAuto zum Glück nöd selber abbschlosse het. :-) Überglücklich simer denn wieder zrugg uf San Francisco gfahre und hend us dem Abentür üsi Lehr zoche, dass wemer anderi Lüüt i erem Unglück uslacht es ein au treffe chan. 

Roadtrip 6: Los Angeles 10pers, 3Tage  29.11.13 - 1.12.13
1 Schweiz, 1 Frankreich, 1 Italien, 1 USA, 4 Deutschland, 2 Polen

De Emie eri Kollegin het es paar Lüüt gsuecht wo mit ere uf Los Angeles fahred. Drum het mi d Emie gfroget öbi bi dem Trip wil mitmache. Das het de erschti Trip söle werde wo mer nume mitmached und nix müend organisiere. Aber sclussendlich isches ganz andersch usecho. D Wohnig wos bueched hend  isch nume e Reservation gsi und ohni e Kreditcharte hetets das Superagebot für e Wohnig für 8 Persone (mir sind mit 10 pers ine), 2 Nächt für 440$ verlore. Und di einzig Person wo e Kreditcharte bsitzt bin i gsi. Nochere lange informationsustuschsitzig mite Organisatorin hani usegfunde das nöd nume d Unterkunft nöd würklich buechet isch sondern au no keis Mietauto und en richtige Plan was mo so chan mache in Los Angeles isch au nöd vorhande gsi. Also hed sich d Emie und I wieder zeme due und hend en last minute trip zemebastlet.

Mir sind denn ide Nacht losgfahre und gad 6h bis zum Santa Monica beach duregfahre, wo dRoute 66 ufhört. Döte hemer Zmörgelet und sind nochher id Stadt gfahre zum Hollywood und all die breüemte Sache aaluege. Nochäm Walk of Fame simmär denn gmüätlich zudä Feriäwohnig und händ Znacht kochät. Will dWohnig numä für 8 Lüt gsi wär, hämmär ä Luftmatratzä mitgno, dassmär s10tä chönd übärnachtä. Am nöchschtä Tag isch Stadtbesichtigung agsait gsi: Zersch simmär is Disney Theater, denn is Observatorium mitämnä supär Usblick übär dStadt, vo döt ischäs denn numä no än churzä Wäg gsi bis zum Hollywood Zaichä. Am nöchschtä Tag sind 6 vo üs id Universal Studios. DEmie isch mit erä Stöck die letschtä Täg rächt langsam gsi, da händ ä paar gar nöd luschtig gfundä. DUniversal Studios händ üs abär grad än Rollstuähl gratis zur Verfüägig gstellt. So hämmär grad alli Schlangänä bidä Bahnä chönä übärspringä und händ niä mösä astoh :-) Und ufzmol händ alli adä Emie Freud gha... So hämmär i chürzästä Ziit alli Bahnä chönä machä, und da numä will Rollstuählfahrär plus Beglaitär nöd müänd astoh. Am Obäd simmär denn bequem vodä andärä 4 abgholt wordä und müäd is Bett kait. Am nöchschtä Tag simmär denn au scho wiedär zrugg uf San Francisco gfahrä.

Roadtrip7: Death valley, Las Vegas, Grand canyon, Sedona, Phoenix 5pers, 6 Tage 22.12.13 - 27.12.13
1 Schweiz, 1 Italien, 1 Deutschland, 1 Kanada, 1 Taiwan

Aigäntli hetämär dä Trip mit 2 Autos söllä machä. Wo i noch Travelbuddies gsuächt han, hät mi ain mit ä paar andärä kontaktiert, wo au hätnd wellä mitcho, so dassmär schlussendli z8tä gsi weräd. Laidär hät da nöd so klappät, will dä Typ alläs hät wellä duräplanät ha. Zudem hätär da 2. Auto nöd chönä uftriipä, so dass mir mitäm 1. Auto schomol mit 5 Lüt losgfahrä und diräkt zum Death Valley sind. Do isch dä Namä Programm. Äs isch würkli alläs tot, abär äs git seeeehr viel Sand. Noch ä paar chlinä Wandärigä, simmär an tüfschtä Punkt cho, wo 58m undäräm Meerässpiägäl isch. Isch ächt warm gsi! Normalärwiis häts döt än Salzsee. Allärdings isch dä chli uströchnät gsi. Do hani au serscht Mol Sanddünä gseh. Ä paar sind wiä verstainärät gsi, wills mitäm Wind undäm Wassär värmixt wordä isch und sich fascht wiä riisigi Staimuurä afühlät. Irgändwenn simmär hungrig wordä und sind zrugg zum Parkplatz gangä. SMami hätmär Wiähnachtschrömli gschickt, wommär gnüsslich idä Sunnä bi 30 Grad värzehrt händ. Normalärwiis ässi da doch wenns Schnee hät.
Dä nöchscht Stop isch Las Vegas gsi. Döt werdmär mega abzockät. Wennmär online buächt, muämär no mega viel zuäsätzlichi Gebührä zahlä. Da hämmär zum Glück gwüsst und händ üs ai Hotel ohni sottigi Gebührä gsuächt. I ganz Las Vegas gits do numä 3 dävo! Üsäs Hotel isch denn abär rächt günstig gsi. Mir händ pro Nacht und Person numä 6 Dollar zahlt. Zum dä Igang findä, hämmär zersch ämol dur dSpielhallä mösä laufä. Do hämmär üs grad ä paar Mol värlaufä, wills aifach riisig gsi isch. Abär im grossä und ganzä fühlt sich Las Vegas sowieso nöd a wiä ä Stadt, sondärn wiä ä riisigs Disneyland. Übärall gits Shows und Themägebiät und värschidäni Ständ. Mir sind so uf Venedig, zudä Pyramidä und zudä Freiheitsstatuä cho. Dankämnä Guätschii vo Groupon simmär denn au no go Gokart fahrä bevormär wiitär zum Hoover Dam, ainä vodä gröschtä Damm zAmerika, gangä sind.
Vo do ischäs wiitär zum Gran Canyon gangä. Isch abär gar nöd so beidruckänd gsi. Goht aifach wiit abä, wiä bi üs idä Schwiiz. Au döt simmär wiedär go wandärä und sind denn grad wiitär uf Sedona zum Red Walk. Do häts übärall würkli grossi roti Felsformationä mit luschtigä Formä. Da hät üs viel bessär gfallä als dä Grand Canyon. I därä Gägänd (Mesa-Verde) gits au viel azluägä vodä Indianer wo mol do gläbt händ. Dur sLandäsinnärä vo Arizona ischäs denn uf Phoenix gangä. Trotz dä Wüäschti sind übärall riisigi Kaktus gwachsä, diä mit dä grossä Ärm und dä vielä Stachlä. ZPhoenix sälbär gits abär nöd viel zsgeh. Mir sind denn zrugg uf Los Angeles gfahrä, will diä us Dütschland aigäntli äs Aupair adä Ostküstä isch und mi äxtra wäg dem Trip bsuächt hät. Also hämmär zLA alläs nomol gmacht. Und denn ischäs i aim Schnorz wiedär zrugg uf San Francisco gfahrä.

Da isch jetzt doch scho ä Wili her. Mittlärwiilä bini scho wiedär am Raisä, dasmol Fiji, Neuseeland, Australiä, Japan und Thailand. DFötäli chömäd bald ;-)

Liäbs Grüessli vode Andrea