Gastpost von Andrea: Mini Gastfamilie.

Hallo mitenand.
I ha denkt i loh au mol wieder was vo mer ghöre..
soo hüt zeigi eu mol wie mini Gastfamilie so usgseht..

Das isch min neue Fründ. Er heisst Zachary isch 8 Mönet alt und immer am lache. Sini Hobbies sind mi chräble, bisse, a mir umesuggele, a mine Hoore züche, mini Brille chlaue, uf mir umeturne, sis Esse (frisch oder halb verdaut) uf mine Kleider verteile und mi mit grooose Auge aluege.

Das isch d'Zoe sie isch 5,5 Johr alt het gad mitem Chindsgi agfange und liebts zum im Park ufeme Spielplatz spile.

Das sind mini Gasteltere Matt und Susan mite Zoe wo sie no chli jünger isch. Die zwei sind immer suuuper lieb und helfed mir immer weni e Frog han oder öppis in Englisch nöd verstoh.

So und zum Schluss gsehnder auno mi mitem chline Zach wimer wi fast immer am umeblödle sind.

Liebs Grüässli usem sunnige Californie vode Andrea.

Interrail: Venedig und dHaifahrt

SWättär häts am letschtä Tag grad nomol guät gmaint mit üs. Äs het beraits am 11i söllä afangä schiffä, abär mir händ wiedär mol numä strahländä Sunnäschii gha. Zudem ischäs nomol richtig haiss gsi. Venedig sälbär isch wiämärs sich vorstellt: Viiiiel Bruggä und Kanäl, italienischi, farbigi Hüsär mit kaputtä Fassadänä und än hochä Wassärpegel. Äs hät mega viel Touristä gha. I kainärä Stadt uf üsärä gsamtä Rais ischäs so gedrängt gsi. Ischmär abär mol nöd dä Wägwiisär no, sondärn ä Gass näbäddra entlang gloffä, ischmär muusbai ällai gsi.

Ä Gondelifahrt hämmär nöd värmögä. Mir sind abär dä gsamt Canale Grande mitäm Wassärbus (halt dÖV) abgfahrä. Gäg dä Obäd simmär denn zum Camping Rialto zrugg. Dä isch ufäm Venedig Festland und bestoht usärä Pizzeria, WC und Duschi und sus nüt meh. Däfür händs ä diräkti Abindig übärall hi und dä Bus uf und vo Venedig isch all Viertelstund gfahrä. Und sie händ färtig ufgstellti Zält mit richtigä Bettä gha.

Chum simmär ufäm Zältplatz gsi und händ agfangä Znacht ässä, ischäs denn cho go schiffä. Am nöchschtä Morgä ischäs denn richtig chalt gsi. Mir händ grad di langä Hosä und än Pulli brucht. Und än Pulli isch au dä Grund für üsi komisch Hairais gsi: Dä Tino hät sin Pulli zMailand liggä loh. Är hät dä abär unbädingt wiedär ha wellä. Allärdings hät Zugfahrt via Milano, Chiasso für dResärviärig und sBillet idä Schwiiz koschtät, will üsäs Tickät do jo nöd gültig isch. Drum hämmär üs entschidä getrennt haizfahrä. I bi übär Verona, Innsbruck und Bregenz hai und dä Tino via Mailand. Laidär isch dä Pulli nümä umä gsi. Mir händ üs abär zWolfhaldä wiedär troffä und diä Rais mitärä Fläschä Sekt beendät.

Interrail: Nizza & Milano

Laidär häts zNizza dä ganz Tag Rägä agsait gha. Wommär abär am Morgä usäm Zug usgstigä sind, isch kai Wölkli i Sicht gsi und dSunnä hät gschunnä, wiä immär. Üsä Tag isch drum wiedär mol us bädälä bestandä. Natürli simmär au durs Städtli gloffä und händ üs Glacé gholt.

Am nöchschtä Morgä häts däfür gschiffät wiä gstört. Wärädäm 10 minütigä Wäg an Bahnhof simmär pflutschnass wordä. So hämmär abär dRägäjackänä nöd umäsus mitgno. ZMailand häts au grägnät wommär acho sind. Mir händ drum grad rächtsumkehrt gmacht und sind im Bahnhof go ässä. Däno isch wiedär strahländä Sunnäschii gsi und mir händ im Trochnä idä Nöchi vom Dom chönä go umäspaziärä, La Rinascente go aluägä und vorussä go Znacht ässä.

Am Mentig simmär Mailand no bi Tag go aluägä. Will dMetro do rächt günsig isch, hämmär serscht Mol ä Tagäschartä glöst und sind äso umänand gsaust. Will üsäs Hostel nöd ufäm Wäg gsi wär und mir am glichä Tag uf Venedig händ wellä, simmär wiedär mol mit üsnä Rucksäck umägloffä.

Am spotä Nomi hämmär üs denn zu üsärä letschte Stadt vo därä Rais ufgmacht und händs üs ufäm Campingplatz imänä Zält bequem gmacht.

Interrail: Barcelona & Le petit train jaune

ZBarcelona hämmär schnäll üsäs Gepäck abgladä und sind denn zum ehemoligä Olympiagländ gloffä. Zobärst obä acho hämmär ä mega Ussicht übär di ganz Stadt gha.

Am Donnschtig hämmär denn dä "Räscht" vodä Stadt agluägät. Am idrücklischtä isch dFamilia, ä Kirchä, wos ersch Endi 19. Johrhundärt afangä bauä händ. Bis jetzt stönd äfäng 60%.

Am Obäd simmär denn go dWassärspiel bim Fontana Magic go luägä.

Domär als nöchschts uf Nizza händ wellä und mir drum nomol bim Le petit train jaune värbicho wäräd, hämmär denkt, mir probiäräts nomol. Damol hät au alläs klappt und mir sind übär dPyrenäe uf Toulouse cho, wo üsä Nachtzug noch Nizza gfahrä isch.

Interrail: Malves, Narbonne & dä Wäg uf Barcelona

Nochärä sehr ärholsamä Nacht im Wii-Chateau zMalves simmär gmüätlich go zmörgälä und händ denn Velo "gmiätät", wos döt gratiszur Verfüägig stellät. Mir händ üs denn noch Caune-de-Millervois ufgmacht. Äs isch mega haiss gsi und dStross isch meh odärwenigär aifach gradus gangä. Däzuäanä häts kai Schattä gha und mir händ adä praalä Sunnä ufäm schwarzä Teer mösä radlä. Natürli hämmärs denn au no gschafft dä falsch Abzwiger zneh und sind drum übär astock und Stai idä Räbbärgä gfahrä. Mir sind denn abär glich no zCaune acho.

Zrugg im Chateau simmär denn au müäd is Bett gfallä. Am nöchschtä Tag ischäs am 6.53 beraits scho wiitär uf Narbonne gangä. Döt gits numä än chlinä altä Stadtkärn, wo schö isch. Abär sogar döt stoht numä ä alti Kathedralä-Ruinä. Nöd öppä will sie bombadiert wordä isch, sondärn aifach will sie wägä Gäldmangäl, dä Päscht, etc. aifach niä färtig baut wordä isch. Mir händ drum dä Nomittag in Narbonne-Plage am Strand värbrocht, wommär nochärä fascht aistündigä Busfahrt acho sind.

Retour hämmär aigäntli scho am 4i wellä. Äs isch abär kain Bus uftaucht, bismär gmärkt hend, dass dä ganz Nomi numä sottigi fahräd, wommär am Vorobäd het mösä bstellä. Dä nöchscht und letscht Bus wär ersch nochdä 6i gfahrä. Drum hämmär üs churzärhand an Strossärand gstellt und gstöpplät. Scho ca. sfüftä Auto hät grad au aghaltä und üs sogar bis vors Hotäl gfahrä. 

Am nöchschtä Tag simmär wiedär früäh ufgstandä, zum mitäm Le petit train jaune noch Barcelona zfahrä. Äs isch abär wiedär mol andärsch cho. ZPerpignan isch dä Zug nöd gfahrä, abär äs hät än Bus als ÄRsatz gha. Anschinänd händs dä Chauffeur abär irgändwo uftribä, willär nöd ämol gwüsst hät, wiämmärdä Rückwärtsgang inätuät. Zudem sind wäräd dä Fahrt bi strahländäm Sunnäschii immär mol wiedär dSchibäwüschär gloffä. Är hät sich denn au mösä bi Ihaimischä duräfrogä öbs und wos idä jewiligä Dörfär än Bahnhof hät. So hämmär mit 2 Stund Värspötig dä petit train jaune natürli nümä gschafft. Wenigstäns hämmär wiedär chönä mit retour fahrä. Vo Perpignan hämmär denn aifach dä diräktischt Zug noch Barcelona gno, wommär denn au bi grösstär Hitz acho sind.

Interrail: Paris & Carcassonne

Mir händ äxtra diä Züg usägschribä, wo üs kai Reserviärigschöschtä beschert hetät. Laidär händ üs di belgischä Züg än Strich dur dRächnig gmacht. Churz vor Lille häts aifach ghaissä, dassäs ä Störig geb und dä Zug drum nöd wiitärfahrt. Dä Kondukteur hät irgändwas vomänä Bus gredt, wommär stattdessä hetät chönä neh. Abär dä wär natürli nöd i üsäm Interrailticket inbegriffä gsi. Drum simmär retour uf Bruxelles. Döt hät üs dä Schaltärmensch wellä värklickä, dass alli Züg noch Paris usbuächät segäd und mir hüt kai Chance meh hegäd. Mir händ üs entschidä, stattdessä nomol dRoutä via Lille zbrobiärä, da hät abär 18 Euro koschtät. ZLille acho simmär denn an Automat und händ für 3 Euro dä Zug uf Paris chönä buächä. Mir sind also trotzdem no zParis acho. Am Obäd hämmär denn dä Hugo, wonni vo Australiä kenn, troffä und sind adä Seine go Znacht ässä.

Am nöchschtä Tag hämmär denn Wiedär ämol Paris agluägät. Will üsäs Hotäl übärhaupt nöd idä Nöchi vom Gare d'Austerlitz, wo üsä Nachtzug gfahrä isch, gsi isch, hämmär üsi Rucksäck packt und sind mit denä dur dStadt glaufä.

Am Obäd simär denn adä Seine entlang zum Bahnhof gloffä. Döt häts ä Piano gha, wo alli händ dörfä spielä. Mir händ, zum Ziit übärbrückä, amänä Asiat zuäglosät, wo zimli guät gsi isch. Denn ischäs mitäm Nachtzug uf Toulouse gangä, wommär am Morgä am 7i acho sind. DStadt isch so früäh am Sunntig Morgä zimli usgstorbä gsi.

Am Nomittag ischäs denn au scho noch Carcassonne gangä, wommär 10 km ussärhalb imänä Wii-Chateau übärnachtät händ. Zersch hämmär abär no dBurg agluägät, bevormär mitäm Taxi zu üsärä Untärkunft sind.

Interrail: Malmö, København & Amsterdam

Am Morgä früäh, churz noch dä 4i, isch i üsärä Kabinä ufzmol dä Weckär abgangä. Aigäntli hämmär igstellt gha, dass üs sTelefon ai Stund bevormär alegäd, also am 7i, söll weckä. Hät nöd ganz klappät. Willmär eh scho wach gsi sind, hämmär üs irgendwenn usäm Bett qüält und sind dä Sunnäufgang uf Deck go luägä.

ZMalmö acho, simmär denn zersch ämol go zmörgälä und händ denn än Stadtrundgang mit üsnä Rucksäck gstartät. Malmö hät no ganz viel alti Hüsli und obwohls mittlärwiilä ä grossi Stadt isch, gsehts fascht übärall no härzig us.

Am Nommittag simmär denn mitäm Zug uf Kopenhagen übärä. Da goht numä grad ä halb Stund. Viel Ziit hämmär do nöd gha, abär für haps en hotter (Hotdog) und dä Nyhavn häts glangät.

Zrugg am Bahnhof hämmär denn dä Nachtzug noch Amsterdam gno. Aigäntli isch Nacht ächli undärtribä, willmär mitärä Stund Värspötig ersch am halbi 12i acho sind. Willmär im Nachtzug ä Gruppä Amerikaner kennäglärnt und drum nöd würkli gschlofä händ, isch dä Nommittag nur no us aimol dur dStadt laufä, Zmittag/Znacht ässä und früäh go schlofä bestandä. Am Donnschtig hämmär denn sSightseeing nogholt und sind di ganz Stadt mit all dä schönä Grachtä und Bruggä abgloffä. Im Anne Frank Huus simmär zwor nöd gsi, abär dävor gstandä. DSchlangä isch aifach zlang gsi. 

Gäg dä Obäd hät üs denn än Kolleg vom Tino no umägführt. Dä isch halb Holländär und wohnt jetzt zAmsterdam. Drum hämmär grad no än Crashkurs idä holländischä Sproch und Ässgwohnhait übärcho. Domär am nöchschtä Tag am halbi 9i scho händ wellä uf dä Zug go, häts au damol nöd so än langä Obäd geh und mir sind i üsäs Hotelzimmär mit dä 3 Rattä idä Decki und dä Musfallä undäräm Bett go schlofä.