dihai

Diä 4 Wuchä Feriä zFrankrich sind laidär scho wiedär värbi. I bi jetzt beraits sitärä Wuchä dihai. Zum Glück ischäs di ganz Wuchä schös Wättär gsi, so dass dUmstellig nöd allzu schlimm gsi isch. Trotzdem häts än Temparaturschock vo ca. 10 Grad geh. Abär wiä gsait: dSunnä isch zum Glück no chli blibä. Jetzt isch dä Uni- und Arbätsalltag wiedär losgangä und i denkä mir scho wiedär us, wos mi als nöchschts hivärschloht...

sletscht Mol Antibes

Hüt simmär sletscht Mol in Antibes gsi. Statt normal Schuäl hämmär än Usflug id Altstatd gmacht. Döt hämmär nomol bitzäli alläs agluägät und sind denn gmüätlich inäs Kaffi go zmörgälä. Tja, und jetzt sind diä Feriä laidär au scho fascht wiedär umä...

Cap d'Antibes

Am Sunntig simmär am Cap d'Antibes go sünnälä. Das isch, wiä dä Namä scho sait, äs Kapp wo rächt wiit is Meer usägoht. Zum ganz rundumä laufä brüchtmär mehreri Stund. Mir sind jetzt quer durä gangä zum anä chlini värsteckti Bucht zcho und händ döt dä ganz Tag gsünnälät. SKapp isch rächt schön. Äs hät nöd so viel Lüt döt usssä, däfür häts abär au kain Staistrand. Ufäm Wäg döt anä, hämmär lutär värsteckti Luxusvillänä entdeckt, wommär allärdings nöd ganz gseht. I denä wohnäd (odär zumindäst idä Feriä) berüähmti Lüti vom Johnny Depp bis zum Abramovic.Diä hämmär abär laidär nöd gseh ;-)

Parfüm

Hüt bini zGrasse gsi. Aigäntli gits döt nöd so viel zentdeckä ussärt ä härzigs chlisäs Städtli und Parfümeriä. Grasse hät sich beraits im 17. Jahrhundärt scho än Namä idä Parfümhärstellig gmacht und gilt hüt no als "Welthauptstadt des Parfüms" (Das Parfüm spielt au döt). Drum sind mir nöd numä go sStädtli aluägä, sondärn händ grad üsäs aigäts Parfüm ärstellt. Das ganzä bestoht usärä Basis-, ä Härz- und änärä Chopfnotä wo untärschidlich lang ahebäd. I han hüt also bsundärs viel müäsä schnuppärä zum usäfindä, was mir gfallt, damitis nochär wiä imänä Chemielabor han chönä zemämischä. SParfüm isch mega fain wordä. Laidär muäni jetzt no mindästäns 10 Täg wartä, bis sich diä Essenzä richtig gfundä hend und i sParfüm bruchä chan.

Rägä?!?

Oh nai, äs isch doch no passiert, äs hät gescht Nacht grägnät :-S Und nöd numä aifach grägnät: Äs isch richtig Wältuntärgangsstimmig gsi. Vom Balkon ob mir isch än richtigä Wassärfall cho, äs hät donnärät und blitzt als öbs grad übär üs gsi wär und dPalmä händ sich wäg äm Sturm bis fascht an Bodä abä bügt. Ä Wundär, dass diä am nöchschtä Tag no gstandä sind. Dä Schuälwäg gescht Morgä hät denn au dementsprächänd usgseh: Übärall sind Blättär am Bodä glägä und dStrossä sind immär no tails übärschwemmt gsi. I mim Zimmär isch zum Glück trochä blibä, abär mini Nochbürin hät ä riisä Wassärlachä ufäm ganzä Zimmärbodä gha, will dBalkontürä nöd dicht gsi isch. Naja, gescht Nomi hät denn abär au scho wiedär dSunnä gschunä und hüt Nomittag bini bereits wiedär am Strand am Sünnälä gsi.

Sunnäufgang in Monaco, Sunnäuntärgang in Nizza

Dos diä Wuchä irgändwiä nöd mitäm Internet klappät hät (und dä Tino bi mir gsi isch ;-) ), chunt halt ersch jetzt wiedär än Biitrag zu dä letschtä Wuchä. Churz gsait; viiiiel Sunnä, Boot fahrä, Monaco by night und Nizza bi Tag.

Am Mentig hani entli wiedär dä Tino gseh. DHifahrt zum Flughafä isch allärdings chli kompliziärtär gsi. Aigäntli sött all Virtälstund än Bus fahrä. Irgändwenn isch denn au mol ainä uftaucht, zum Flughafä häts denn aber no übär ä Stund durät, obwohl adä Taflä ungefähr 20 - 25 min gstandä sind. Hans denn abär glich no gschafft. Am Zischtig hät denn dSchwiizär Truppä zviertä äs Böötli gmiätät. Da hät sich zwor mega glohnt, isch abär au mega chalt gsi, wennmär gfahrä sind wägäm Wind und äm Wassär wo gsprützt hät.

Am Donnschtig Obäd simmär denn Monaco go aluägä. Aigätntli hämmär welä inän Club, dä hät abär scho zuä gha, wills nümä Saison isch. Drum simmär halt churzärhand Monaco idä Nacht go aluägä (riiisigä Yachtä) und händ drum au dä Sunnäufgang gseh. Am Samschtig hämmär denn Nizza bsuächt. I glaub so viel gloffä bini no niä i mim Läbä. Abär säb hät sich glohnt, Nizza isch aifach mega schön. Sainzig wa chli blöd isch, dassäs kain Sandstrand sondern numä ain mit Chiesäl hät.
Tja, und das wärs au scho wiedär vo därä Wuchä. Morn muän dä Tino laidär scho wiedär wiitär uf London und denn sinds für mi nur no 2 Wuchä bis mini Feriä au scho wiedär värbi sind.