Alpäübärquärig: Tesserete - Melide - Mendrisio - Como

Am Vortag simmär vo Giubiasco uf Tesserete gloffä. Übärnachtät hämmär in Melide. Drum simmär vo Tesserete mitäm Postauto und äm Zug zrugg is Hotel und go Pizza ässä und am nöchschtä Morgä hämmär da Spieli rückwärts gmacht. Zersch simmär mitäm Zug uf Lugano und vo döt us mitäm Postauto wiedär uf Tesserete gfahrä zum di nögscht Etappä zstartä. Vodä Tesserete Statione, wo gar kain Bahnhof meh isch, ischäs grad am Afang ä bitz ufä zum Vita Parcour gangä. Und churz noch üsäm Start ischäs passiert. Mir sind nöd ämol ä Viertälstund undärwägs gsi, bini irgändwiä schreg uf dä Fuäss gstandä und hammärn grad värtrampät. Zersch häts ä bitz gsurrät, abär zum Glück nöd wiitär weh tuä. Drum simmär a farbäfrohä Pilz im Wald und värschidänä Dörfli värbi entlang adä Via Gottardo wiitärgwandäräd.

Leider hät sich min Chnöchäl denn doch gmoldä. I han min rächtä Fuäss immär wenigär chönä belastä und wommär noch 11 km zLugano is Städtli abäglaufä sind, hani numä no chönä humplä. Dä Chnöchäl isch scho ganz gschwollä gsi. Do häts abär sowieso ä Mittagspausä geh. Mir sind a irgänd ä Strossäfäscht anäglaufä und händ üs drum dussä anän Tisch mit Bank gsetzt und jedä hät da vomänä Stand gholt, wonnär grad Luscht gha hät.

Laidär hät min Fuäss au noch därä Pausä nöd bessär usgseh und sWättär hät au immär meh zuägmacht. Vo Melide händ üs zwor nümä so viel Kilometer trennt. Däzwüschäd wär abär dä Monte San Salvatore mit 600 Höhämeter zbewältigä gsi und da hät min Chnöchäl nümä härgeh. Also simmär nochäm Zmittag adä Luganer Promenade entlang gschlenderet, händ ä Glacé gässä und händ üs uf dä Haiwäg gmacht.

Ai Wuchä spötär ischäs mim Chnöchäl wieder guät gangä und mir händ üsi Wandärig fortgsetzt. Da isch ä guäti Entschaidig gsi, denn dasmol isch au sWättär phänomenal gsi und mir händ ä paar guäti Ussichtspünkt ufäm Wäg uf dä San Salvatore värwütscht.

Dobä häts ä Glacé-Pausä geh. Denn simmär abä uf Melide gloffä und händ dVia Gottardo verloh.

Da wärs jo aigäntli scho gsi mitäm Noholä vodä letschte Etappä. So wärämär noch 23.18 km, 975 positivä Höhämeter und 7 Stund 22 Minutä in Melide acho. Mir sind abär immär no fit gsi und sind drum übär dä Damm uf Bissone und denn no uf Maroggia gloffä. Mir händ scho dBefürchtig gha, dassmär übär dä Damm adä Autobahn entlang laufä mönd, abär äs git än wundärschönä Fuässgängärwäg am See entlang, wommär gar nöd märkt, dass hinä durä so viel Autos fahräd. Dä Wäg uf Maroggia isch denn no bitz usäfordärnd gsi. Offäsichtlich wird dä Wäg nöd so oft begangä und mir händän richtig müäsä suächä im Wald innä. Mir händs denn abär gschafft und sind uf Mendrisio go schlofä.

Am nöchschtä Tag isch dEtappä dur dä Wald stail däruf richtig Monte Generoso gangä. Mir händ abär numä bis Bellavista mösä, obwohlmär döt scho fascht alli Höhämetär für dä Monte Generoso gschafft hetät. Wommär zMaroggia gstartät sind, häts än richtigä Lärm vodä Autobahn geh. Dä hät üs no bis wiit ufä beglaität und ersch churz vor Bellavista ischär langsam värklungä.

Dobä acho häts zersch ämol Zmittag geh. Denn ischäs gmüätlich adä Bahnstrecki no abä uf Mendrisio gangä. Do simmär noch 17.84 km, 1501 positivä Höhämeter i 6 Stund 14 Minutä acho. Denn isch zersch ämol dä Wintär is Land zogä und mir händ di allerletscht Etappä ersch im Früählig chönä machä.

Am 14. April 2018 ischäs endli so wiit gsi. Mir sind uf üsi letscht und 18. Etappä gstartät. Vo Mendrisio simmär mitäm Poschtauto zrugg uf Salorino gfahrä und vo döt Richtig Morbio Inferiore gloffä.

Am Fluss entlang hämmär denn dEbeni vor Chiasso übärquert.

Denn ischäs sletscht Mol uf üsärä Alpärübüärquärig ufwärts gangä. Bevormär im Wald dur dä Haag adä Grenzä uf Italiä gschlüpft und uf Como abäglaufä sind, hämmär idä Sunnä Zmittag gässä und dUssicht gnossä.

SWättär isch laidär nümä so sunnig gsi, abär mir sind a blüähändä Magnoliäbäum entlang endlich noch 21.45 km, 595 positivä Höhämeter i 6Stund 20 Minutä zComo acho.

Da simmär natürli go fiirä. Zersch häts än Apéro grad am See geh und aschlüssänd simmär dur sStädtli gschlendärät. Zum Znacht hämmär ä faini Pizzaria gfundä und denn simmär zfriedä im Hotelzimmer igschlofä. Am nöchschtä Tag hämmär nomol Como gnossä, bevormär mit dä Alpäübärquärig abgschlossä händ und hai gfahrä sind.

Do dämit isch dFrog klärt. Zwüschäd Wolfhaldä und Como ligäd 18 Etappä, 350.4 km und 17'209 positivi Höhämeter und mir händ 109 Stund und 16 Minutä däfür brucht. DPlannig isch also nöd schlächt gsi und hät rächt gnau gstummä. Schön gsi! 

Di längst Etappä: Etappä 14 vo Biasca uf Giubiasco mit 27.4 km 

Di maischtä Höhämeter und au grad ziitmässig di längst Etappä: Etappä 8 vo Elm uf Flims mit 1'650 positivä Höhämeter, 1'590 netativä Höhämeter i 7 Stund 57 Minutä

Alpäübärquärig: Biasca - Giubiasco . Tesserete

Wills bidä letschtä Etappä so haiss gsi isch, händ sich gwüssi Personä für ä Pausä im Summär usgsprochä und so simmär ersch im September wiitär gloffä. Äs hät sich allerdings usägstellt, dass sich diä Etappä sehr guät für än haissä Tag gaignät het, will än grossä Tail vodä Wandärig dur schattigi Waldabschnitt gführt händ.

Diä Etappä hät so guät wiä kain Höhämeter ufwärts gha und so ischäs gmüätlich am Ticino entlang noch Bellinzona gangä.

Vo Bellinzona ischäs denn numä no än Chatzäsprung noch Giubiasco gsi, wommär noch 27.41 km, 63 positivä und 111 negativä Höhämeter i 6 Stund 8 Minutä acho sind. Da isch wiitus diä Etappä mit dä wenigstä Höhämeter gsi, sowohl ufä als au abä. Däfür au vo allnä kilometermässig di längst.

Endi Semptember ischäs denn wiitär gangä. Zersch simmär vo Giubiasco gmüätlich is Nochborsdörfli Camorino gloffä, bevors denn dur dä Wald steil däruf isch. Irgändwiä isch abär sMami uf zmol nümä no cho und da isch nöd unbädingt dra glägä, dassäs däruf gangä isch. Dä ganz Wald isch vollä Tannäzapfä und voralläm Kastaniä gsi, so dass sich sMami grad mit dä ganzä Wiähnachtsdeko usgstattät hät. Dodäbi isch abär au eren Rucksack vollär und vollär wordä und mir sind erscht am Afang vo üsärä Wandärig gsi.

Irgendwenn hämmärs denn abär doch übär dä Hügäl gschafft und üs än Burger in Isone värdiänt. Dä isch fantastisch gsi, da Restaurant hät än aigänä Smoker gha und verwöhnt offäbar dämit dMilitärlär.

Frisch gstärcht, hämmär dä zwaiti Astig i Agriff gno bevormär gmüätlich abägloffä und in Tesserete noch 17.39 km, 1'139 positivä Höhämeter und 6 Stund 14 Minutä acho sind.

Zwüschästand: 287.9 km, 14'138 Höhämeter+, 89h 20min