Wiä jedes Johr hämmär au damol ä paar Täg zLondon verbrocht. Das Johr hät sich abär i zwai Pünkt untärschiedä: 1. Mir händ üs ä Hotel mit Wellnesbereich glaistät, willmär für dFlüg numä 20 Frankä hi und zrugg zahlt händ. 2. Dasmol isch chli wenigär pöschtälä, däfür meh Sachä aluägä ufäm Programm gstandä. Ain Tag simmär drum in Bus igstigä und is 2 Stund entfehrnte Stonehenge gfahrä.
Idrücklich ischäs scho, wemmär bedenkt, dass diä Stai scho scho sit meh als 5'000 Johr do stönd und mir bis hüt nöd äso gnau wüssät, wiäs di riisigä Blöck anätransportiert händ. Mir händ grad au än guätä Ziitpunkt verwütscht: sWettär isch genial abär numä so umdi 2 Grad gsi. Da hät viel Touristä abghaltä, sich längär dussä ufzhaltä und mir händ Stonehenge fascht für üs ällai gha.
Ain Tag spötär hämmär dank ämnä Kolleg, woni vom Praktikum zFrankfurt kenn, Bloomberg chönä go aluägä. Am Nomi isch ä wiitäri gschichtsträchtlichi Sehenswürdigkait ufäm Plan gstandä: Dä Tower of London.
Da isch ä mega Burgalag, wo im 11. Johrhundert als unübäwindbari Festig baut wordä isch. Zu Spitzäziitä händ bis zu 2'000 Lüt döt innä gwohnt. Zudem isch dä Tower au als Gfängnis gnutzt und di Aklagtä grad näbäd dra ufäm Tower Hill köpft wordä. Di berüähmt Tower Bridge isch ersch viel spötär näbäd dra bauä wordä und hät erä Namä wäg därä Festig übärcho.
Und denn isch üsi Ziit in London scho wiedär värbii gsi und mir sind zrugg id Schwiiz gflogä.
