um dWält

DAndrea isch jo scho äs ziitli in Kaliforniä. Drum simmär sie no schnäll di letschtä zwei Wuchä go bsuächä, bevor sie im Juni haichunt. Wommär zOakland (grad näbäd San Francisco) acho sind, häts zersch ämol aifach numä gschiffät. DAndrea hät gmaint, da heg sie wäräd dä ganzä 10.5 Mönät niä ärläbt. Tja, drum simmär grad zersch ämol go di grossä Ichaufszenträ go aluägä, bevormär äs Auto gmiätät händ und in Yosemite National Park gfahrä sind.

Döt acho, ischäs au scho mitäm nöchschtä Wättär-Extrem wiitärgangä: Schnee! Mir händ zmitzt im Nationalpark im Curry Village imänä unghaiztä Zält gschlofä. DAndrea hät üs no Schlofsäck organisiert und in Oakland simmär no go Vliesdeckänä chaufä. Mir händ gwüsst, dass chunt go schnaiä, drum hani sogar dBettfläschä ipackt, abär dä Morgä hät üs denn doch ächli übärrascht.

Dank Wintärjackä isch da abär kai Problem gsi. Dä Schnee hät di ganz Landschaft fascht ächli kitschig gmacht. DBäärä sind vor lutär Schreck wohrschinli grad wiedär go schlofä. Mir händ uf all Fäll kaini gseh.

Wills ufäm Retourwäg noch Oakland immär no grägnät hät, simmär grad i zwei Outletcenter und händ üs mit Levis Jeans, Schuäh und Ledärjackänä ideckt :-). Denn ischäs endli Früählig wordä. DSunnä isch fürä cho und mir sind San Francisco go aluägä. Ä Jackä hätmär abär schono brucht. Däfür hämmär dGolden Gate Bridge ohni Näbäl verwütscht.

DAndrea hät üs in San Francisco übärall anägführt und -gfahrä. So simmär am Fisherman's Wharf imänä altä U-Boot und bidä Seelöwä gsi, sind Cable Car gfahrä und händ dStadt vo verschidänstä Ussichtspünkt agluägät.

I hanmär San Francisco viel grössär vorgstellt. Äs hät abär fascht kai hochi Hüsär und chunt aim ehär wiänä grossäs Städtli vor.

Will grad idä Nöchi dBerkeley Universität isch, hämmär denkt mir gönd sie mit üsnä HSG Pulli go crashä. Dä Plan isch abär nöd ufgangä. Denn genau a dem Tag isch dä Summär cho. Mir sind langärmlig und mit Jackä gstartät. Händ denn abär schnäll gmärkt, dassäs viel zhaiss isch. Üs isch dä Schwaiss numä no so abäglaufä und das mit T-Shirt! Mir wäräd am liäbstä idä Badhosä umägloffä.

Am Obäd ischäs denn abär schnäll wiedär frisch wordä und mir sind froh um üsi Pulli gsi.

Am zwaitä Summärtag isch Alcatraz dra gsi. Währänd dAndrea mit dä Chind id Badi isch, sind mir go sGfängnis unsichär machä. Mi cha sich fascht nöd vorstellä, dass niä öpärt erfolgrich usbrochä isch, schint doch sFestland so nöch. Abär dStrömigä und dChälti vom Wassär verunmöglichäd da.

Zum Schluss simmär no dä Highway 1 dä Küschtä no abwärts gfahrä. DGasteltärä vodä Andrea händ üs grad eräs Auto überloh, damitmär nöd nomol ais mönd miätä. Äs isch zwor wiiterhin sunnig gsi, abär adä Küstä isch asä än chaltä Wind gangä, dassäs mängmol grad nümä gmüätlich gsi isch. Mir sind also wiedär zrug zu Pulli und Jackä. DKüstästross isch mega schön gsi, da hät sich richtig glohnt. Mir sind denn noch Santa Cruz und Monterey bis in Big Sur und in Pfeiffer National Park gfahrä, händ viel Fötäli gmacht und dä Tag gnossä.