Wiähnachtsziit in und um Frankfurt

Scho wiedär sind 3 wiitäri Wuchä vergangä. Noch London ischäs zFrankfurt endli wiedär mol schös Wättär gsi. Da hani gnutzt und han än Usflug uf Höchst gmacht. Da isch mittlärwiilä än Stadttail vo Frankfurt mittärä chlinä Altstadt und ämnä Schlössli.

Und denn ischäs au scho Wiähnachtsziit wordä und übärall sind Liächtärchettä ufghenkt und Ständ ufbaut wordä. Dä Wiähnachtsmarkt zFrankfurt isch abär nöd gnuäg gsi, drum simmär no noch Mainz und uf Nürnberg.

Und damitmär no meh i Wiähnachtsstimmig chömäd, simmär zFrankfurt no go schlittschüählä. Döt hämmär ä bösartigi Pinguinhaltig ufdeckt, laidär hämmärs nöd chönä befraiä und sie stönd no immär döt ;-)

zFrankfurt und doch niä do

Wiitäri 4 Wuchä sind värgangä und äs isch mega viel passiert. Am 28.10. bini mitärä Gruppä

Ustuschstudentä dFrankfurtär Börsä go aluägä. Isch mega spannänd gsi, abär übärhaupt nöd hektisch wiäni denkt han. Di maischtä händ uf aim vo ernä vilnä Bildschirm Fuässball gluägäd odär Spieli gspilt. :-) Uf dä Bsuächärgallerie obä isch jedi Bodäplattä amänä andärä Titel zuägordnät gsi. Wenn dä grad gstigä isch, ischäs grüä und sus rot wordä.

DRussinä händ i derä Wuchä denn mol gsait, sie wöräd gärn uf Paris. Drum hämmär churzärhand äs Auto gmiätä, dä Dän und dä Finn no gfrogäd, öbs au mitcho wönd und sind übärs Wuchäend schnäll go dStadt aluägä. I bin jo mitlärwiilä scho sächs Mol döt gsi, abär äs isch immär wiedär schön. ZParis hät sich denn no än wiitärä Russ vo Frankfurt däzuägsellt, wo per Zuäfall grad au döt gsi isch.

Mir händ mega viel Glück gha mitäm Wättär. Am Samstig ischäs sogar ca. 24 Grad wordä mit blauäm Himmäl dä ganz Tag. Am Sunntä wär denn Rägä agsait gsi, abär au do isch dSunnä immär wiedär zwüschäd dä Wolkä fürä cho und mir händ kain ainzigä Tropfä gspürt. SProgramm isch Standard gsi. Da hani fäng so viel mol gmacht und äs wird trotzdem niä langwiilig: Louvre, Notre Dame, Eiffelturm, Arc de triomphe, Sacré-Coeur, Moulin rouge, Champs-Elysées, Place des Vosges und Bastille. Am Samtig Obäd isch dä Hugo no däzuägstossä und hät mit üs Znacht gässä. Und denn simmär au scho wiedär zrug uf Frankfurt gfahrä.

Ä Wuchä spötär bini denn scho serscht Mol zrug id Schwiiz gfahrä. SWuchäend hani mit Vimentis verbrocht, dWuchä mit Lärnä. Zwüschädinnä hani denn no schnäll Geburtstag gha und ä faini Tortä vom Mami mitäm Gotti gässä. Und denn isch diä Wuchä au scho umä gsi. Anstatt zrug uf Frankfurt zgo, hani dä Tino gschnappt und mir sind schnäll mitäm Flügär uf London gflogä.

Wiä da halt so isch mitäm Tino und London, simmär alli altä Lädä idä Jermyn Street go abklappärä. Näbädbi simmär natürli au dä Hyde Park und dä Big Ben go bsuächä und händ als krönändä Abschluss im Shard im 52. Stock Cocktail gschlürft. Denn ischäs Ziit gsi zum zrug uf Frankfurt flügä, woni am Zischtig bzw. Mittwoch am halbi 1 idä Nacht acho bin.

Die erstä paar Wuchä zFrankfurt

Da isch schnäll gangä. I bi scho fascht 3 Wuchä zFrankfurt. Am 9.10.2014 ischäs mitäm Zug übär Züri los gangä. Dasmol hät di Dütsch Bahn numä (!) 20 min Verspötig gha. ZFrankfurt acho, hani mi zersch ämol im Five Elements Hostel idä Nöchi vom Hauptbahnhof und zmitzt im Rotliächtmilieu iquartiert. SHostel isch abär supär gsi! Zimmer sind mega subär und dDuschi und dWCs weräd drü Mol am Tag putzt. Dä Zmorgä vom Buffet isch inbegriffä gsi.

 

Und denn ischäs au scho los gangä. Di erschtä paar Täg sind vor alläm Ifüährigä gsi, damitmär dKürs chönd wählä und üs zrecht findät. Natürli hät au dä Usgang nöd dörfä fählä. So hani ganz viel Lüt us dä ganzä Wält kennä glärnt. Ufäm Bild sind zwei Portugiesinnä und ä Japanäri. Maischtäns bini abär mit zwei Russinä, aim Finn, aim Dän und aim Schwed undärwägs. Und zwüschäddürä chunt no ä Französin, än Belgier und än Italiänär däzuä.

Dä Campus Westend isch mega gross und behärbärgt 45'000 Studentä (St. Gallä hät 7'000). Är isch mega schön gmacht mit viel Brünnä, Bäum und Wiesä.

Übrigäns sind diä Hüsär chlinär als usgsehnd. Dä Architäkt hät ächli bschissä und gägä obä jedi Fenstärraihä chlinär gmacht, damits höchär usgseht. Mi gsehts links bsundärs guät. 

Tja, und denn hani am 17.10.2014 endli i mini Wohnig chönä iziäh. Am Samstig isch denn d100 Johr-Fiir vodä Goethe Uni gsi. Da Fürwärch isch sensationäll gsi, im Video gsehndär numä no grad dä Schluss, nochdems vorhär scho 10 min so zuä und här gangä isch.

Willi brav go joggä bin idä erschtä Wuchä, hani am Sunntig druf än 10 km-Lauf zRodgau-Weiskirchen gmacht. Dä wird au Häxälauf gnennt, wills um ä Hüsli im Wald isch. Äs sind drum au ganz viel als Häxä värklaidät gsi.

Wills damol au numä no 16 Grad und nöd 30 gha hät bini au fascht 10 min schnällär gsi wiä zFüssen. :-)

Ä Wuchäend spötär sind am Samstig alli Museä gratis gsi, drum bini mit dä Russinä is Museum für Kommunikation, is Architekturmuseum und is historischä Museum. Und willi no zwenig Kultur gha ha, bini am Sunntig mitäm Schwed is Goethe-Haus. Isch mega spannänd gsi. Laider isch sHuus zerbombt wordä, so dass nümä viel original isch. Äs isch aifach originalgetreu wiedär ufbaut wordä. Abär isch trotzdem guät gsi.

I han mi also scho guät igläbt und äs isch immär chli öpis los do. Mol luägä wa idä nöchschtä paar Wuchä no so passiert. Und wär gnau ufdä Homepage luägäd, gseht au scho wa als nöchschts plant isch. ;-) Übrigäns bini vom 7.11.-15.11.2014 scho serscht Mol wiedär idä Schwiiz.

Nizza

Afangs September hämmär dä Schwiizär Summär endgültig ufgeh und sind uf Nizza ad Côte d'Azur. Da isch ä supär Entschaidig gsi. Mir händ 5 Täg supär Wättär gha und sWassär isch härrlich erfrischänd gsi. 

Am erstä Tag simmär Antibes go aluägä. I bi jo döt vor 4 Johr im Sprochufänthalt gsi. Dä Tino und i händ drum dAndrea chli umägführt. Äs isch gsi wiä immär. Ä chlisäs härzigs Städtli mitämnä värstecktä Strand grad hindär dä Stadtmuurä. Nochäm bädälä, simmär durs Städtli bis uf Juan-les-Pins glaufä und händ döt Znacht gässä und än Colossal im Crystal trunkä.

Zrugg in Nizza simmär am riisigä Brunnä värbii gloffä. Dä isch grad i Betrieb gsi und hät supär usgseh.

Am zwaitä Tag simmär uf Cannes. Ich und dAndrea händ rächti Blotärä adä Füäss übärcho vom Spaziergang am Obäd vorhär. Drum simmär zersch ämol uf Schuähsuächi. I han zum Glück no äs andärs Päärli däbi gha, dAndrea hät denn scho noch ä paar Minutä ä passänds gfundä.

Drum ischäs kai Problem gsi, zum chlinä Schlössli ufäm Hügäl zCannes ufälaufä und dUssicht zgnüssä. Döt häts au än wohlvärdiäntä Zmittag geh, wa üs ä paar Möwä und Tuubä händ wellä striitig machä. Au do simmär natürli wiedär go bädälä.

Am drittä Tag simmär zNizza blibä. Da hämmär bis do anä jo no gar nöd richtig gseh. Mir sind gmüätlich dur dAltstadt gschlendäräd, händ Glacé gässä, dä Friedhof und dä Schlosshügäl agluägät und sind denn übär dä Hafä wiedär retour zum Strand gloffä.

Denn simmär nomol ächli go bädälä, bevor mär gäg dä Obäd uf Monaco sind. Mir sind äxtra uf dä Bus, damitmär dä Küstä entlang fahrä chönd. Äs isch au mega schön, abär au ewigs lang gsi. Monaco hämmär schnäll agluägäd gha. Äs isch jo nöd so gross. Abär dFotis sind genial wordä.

Dasmol simmär mitäm Zug retour. Dä hät jo numä 10 Minutä. Zrugg in Nizza häts endli Znacht geh und mir sind denn noch dem langä Tag go schlofä.

Am viertä Tag simmär is Cap 3000. Da isch ä Ichaufscentär zNizza. Laidär hämmär dä Morgä chli värtrödlät und mir sind döt ersch gäg dä Mittag acho. Däfür hämmär zersch grad ämol Zmorgä/Zmittag gässä und sind denn dur di ganzä Lädä gloffä. Natürli häts für da dä ganz Nomi brucht, so dassmär nöd ämol meh zum bädälä cho sind.

Dä Sunnämangäl hämmär denn grad am letschtä Tag wett gmacht. Mir händ usgschlofä, sind mitäm Zmorgä vodä Bäckerei diräkt näbäd üsärä Wohnig an Strand und händ gsünnälät und bädäläd bis in Nomittag inä. Denn hämmär au scho mösä go packä, dAndrea isch no schnäll zum Wassärfall, wo ä paar Täg vorhär nöd in Betrieb gsi isch und schlussendli simmär zum Flughafä zrug idi chalt Schwiiz.

Wohnigssuächi zFrankfurt

Am Sunntig simmär mitäm Zug uf Frankfurt gfahrä, go ä paar Wohnigä azluägä. Abäm Oktober studier i döt ai Semester. Natürli hämmär au Ziit gha zum dStadt aluägä. SWättär hät laidär nöd so mitgspielt, zum Glück ischäs abär fascht immär trochä gsi.





Frankfurt isch mega grüä und viel wenigär verbaut alsi denkt han. DInnästadt isch nöd mega riesig. Äs stönd äs paar Wolkächratzär umä, dänäbäd isch abär scho dä alt Tail vodä Stadt, wod Hüsär numä no 4 Stöck händ.

Numä zwai U-Bahn Stationä wiitär ischmär denn wiä innärä andärä Wält. Äs sind chlini Quartierli mit Parks wo so gar nöd noch Grossstadt usgsehnd. Zum Schluss simmär no schnäll uf dä Main Tower, szwait höchschti Gebäude in Frankfurt. DUssicht isch supär gsi und mi hät grad mol gseh, dass diä Stadt doch grössär isch alsmär denkt.

Schlössli und Citylauf zFüssen

Letschtä Samstig ischäs asä schös Wättär gsi, da hämmär grad mösä usnutzä. Mir sind uf Füssen gfahrä und händ döt di baidä Schlössli Hohenschwangau und Neuschwanstein agluägät. Zum Glück simmär früäh ufgstandä, mir händ nämli scho 20 min mösä astoh zum Ticket chaufä. Denn hämmär däfür au grad sSchloss Hohenschwangau chönä go aluägä. Ufäm Prospekt stoht, mi heg 20 min bismär ufä glaufä seg, mir sind denn abär scho i 6 min dobä gsi.

Denn isch au scho churz noch dä 11i gsi und mir sind go Zmittag ässä. Chum hämmär üsäs Ässä übärcho, isch am Restaurant dä Strom usgangä. Glück gha! :-) Laidär häts bim Bus und bi dä Kutschä ä riiiiiesigi Schlangä gha, so dassmär halt dä 40 minütig Wäg lut Prospekt zum Schloss Neuschwanstein undär dFüäss gno händ. Allärdings sinds au do zimli dänäbät glägä. Mit Glacépausä hämmär numä 25 min brucht.

Denn hämmär üs uf dä Wäg zum Auto gmacht. Da hämmär allärdings nümä gfundä... Mir händ 3 Parkplätz abgsuächt, abär kainä isch dä richtig gsi. Schlussendli hämmär denn no än viertä ächli versteckt gfundä und döt isch denn au sAuto gstandä. Diä Suächaktion hät üs ächli Ziit kostät. Drum simmär schnäll uf Füssen gfahrä, döt in See inäghüpft, schnäll go sünnälä und denn ab zum aigäntlichä Event vo dem Usflug: Dä Citylauf vo Füssen. I bin serscht Mol i mim Läbä 10 km joggäd und da i brüätändär Hitz vo übär 30 Grad. Abär äs isch alläs supär gloffä. I bi sogar no schnällär gsi als im Training.

DAndrea und dä Tino händ idä Zwüschäziit Saich gmacht und sind go Wassärpistolä chaufä zum mi Abschüssä. 

Zum Abschluss simmär no go chinesisch ässä und dä Halbmarathon luägä und sind denn nochäm Rangvärläsä wiedär haigfahrä.