Endi September hämmär üs ufd Etappä 6 & 7 vo üsärä Alpäübärquerig gwogt. Dä Tino hät im WK sin Fuäss värstuucht, drum simmär numä zdrittä losgloffä. Dasmol hämmär sogar chönä Usschlofä. Nochämnä gmüätlichä Zmorgä dihai, simmär mitäm Auto bis uf Sargans gfahrä, wommär denn ersch am halbi 11i gstartät sind. Zersch simmär gmüätlich dä Glais no uf Mels gschlenderet und händ üs no vor dä erschtä Höhämetäer für än Kaffi mit Gifpeli entschiedä.
Frisch gstärkt hämmär denn ä paar Höhämeter undär dFüäss gno. A dem Tag isch Alpabzug gsi und mir händ sGebimmäl scho vo wiitäm ghört. Laidär sinds ufdä andärä Talsiitä därab gloffä, so dassmär kai ainzigi Chuä troffä händ. Zwüschätinnä hämmär abär usäm Wald usä än churzä Blick ufs Spektakäl chönnä erhaschä.
Übär Stock und Stai, ä paar chlinärä Flussübärquerigä undärä Mittagspausä ufämnä sunnigä Bänkli ischäs wiitär noch Wiistannä gangä. Gemäss dä Wägbeschriebig vodä Via Alpina, wär das scho sEndi vo dem Wandärtag gsi. Wills abär sonä churzi Etappä gsi isch und willmär dDistanz vom nöchschtä Tag händ wellä värchürzä, simmär denn nomol ä Stund wiitär id Alp Siez gloffä. Natürli ersch nochdä offizielle Trinkpausä innärä Gartäbaiz mit chlinnä, värspiltä Chätzlis.
Idä Alp Siez simmär denn noch 17.1 km und 1'081 positivä Höhämeter i 5 Stund 20 Minutä acho und mit Älplermagronä innärä warmä Stubä belohnt wordä, bevormär in Massäschlag go pfusä sind.
Am nöchschtä Tag simmär denn biziitä ufgstandä und händ än supär Zmorgä mit Chääs vodä Alp Siez gnossä. Denn ischäs wiitär id Höchi gangä. Noch vielnä wiitärä Wassärfäll und ä paar härusäfordändä Stiigigä simmär pünklich zum Zmittag ufäm Foopass acho.
Ufäm Abäwäg häts denn nomol ä Verschnuufspausä innärä Alp geh, bevormär noch wiitärä Wassärfäll, 18.4 km und 1'161 positivä Höhämeter i 6 Stund 8 Minutä zElm acho sind. Vo döt hämmär dä Zug zrugg zum Auto zSargans gno und sind denn zfriedä hai gfahrä.
Zwüschästand: 123.1 km, 7'214 Höhämetär+, 39h 20min
