Wa lit zwüschäd Wolfhaldä undäm Comosee? 18 Etappe, 347km und 16'586 Höhämetär. Also los gohts!
Di erscht Etappä hämmär beraits am Mentig, 5. Mai undär dFüäss gno. Mir sind bi perfäktem Wättär ufäm Witzweg noch Heiden gstartät.
Döt ischäs am Alpäpanoramawäg Nr. 3 in Kaienspitz ufägangä, wommär ä härrlichi Ussicht ufdä Bodäsee händ chönä gnüssä.
Und do hämmär au dä erschti Blick ufdä Alpstei mit viel Schnee chönä erhaschä.
Denn ischäs wiitär übär Rehetobel uf Trogä gangä. Noch dem Astig simmär scho ghörig is Schwitzä cho.
Zmittag häts abär ersch idä Hohe Buächä geh.
Noch därä Stärkig ischäs zügig in Bühler abägangä. Und will üs numä no 1 Hügäl vo Appäzell trennt hät, simmär dä letscht Astiig grad au no gloffä.
Da hät sich denn abär nomol fascht 2 Stund hiizogä.
Im gmüätlichä Trab und mit langsam müädä Bai, hämmär noch 6h48min, 24.7km und 1'134 positivä Höhämetär Appäzäll ärraicht.
Döt hämmär üs zum Schluss ä Glacé gönnt und sind müäd mitäm Appäzällärbähnli haigfahrä.
Schön gsi!
