Alpäübärquärig: Biasca - Giubiasco . Tesserete

Wills bidä letschtä Etappä so haiss gsi isch, händ sich gwüssi Personä für ä Pausä im Summär usgsprochä und so simmär ersch im September wiitär gloffä. Äs hät sich allerdings usägstellt, dass sich diä Etappä sehr guät für än haissä Tag gaignät het, will än grossä Tail vodä Wandärig dur schattigi Waldabschnitt gführt händ.

Diä Etappä hät so guät wiä kain Höhämeter ufwärts gha und so ischäs gmüätlich am Ticino entlang noch Bellinzona gangä.

Vo Bellinzona ischäs denn numä no än Chatzäsprung noch Giubiasco gsi, wommär noch 27.41 km, 63 positivä und 111 negativä Höhämeter i 6 Stund 8 Minutä acho sind. Da isch wiitus diä Etappä mit dä wenigstä Höhämeter gsi, sowohl ufä als au abä. Däfür au vo allnä kilometermässig di längst.

Endi Semptember ischäs denn wiitär gangä. Zersch simmär vo Giubiasco gmüätlich is Nochborsdörfli Camorino gloffä, bevors denn dur dä Wald steil däruf isch. Irgändwiä isch abär sMami uf zmol nümä no cho und da isch nöd unbädingt dra glägä, dassäs däruf gangä isch. Dä ganz Wald isch vollä Tannäzapfä und voralläm Kastaniä gsi, so dass sich sMami grad mit dä ganzä Wiähnachtsdeko usgstattät hät. Dodäbi isch abär au eren Rucksack vollär und vollär wordä und mir sind erscht am Afang vo üsärä Wandärig gsi.

Irgendwenn hämmärs denn abär doch übär dä Hügäl gschafft und üs än Burger in Isone värdiänt. Dä isch fantastisch gsi, da Restaurant hät än aigänä Smoker gha und verwöhnt offäbar dämit dMilitärlär.

Frisch gstärcht, hämmär dä zwaiti Astig i Agriff gno bevormär gmüätlich abägloffä und in Tesserete noch 17.39 km, 1'139 positivä Höhämeter und 6 Stund 14 Minutä acho sind.

Zwüschästand: 287.9 km, 14'138 Höhämeter+, 89h 20min

Alpäübärquärig: Terrihütte - Olivone - Biasca

Nochärä ärholsamä Nacht idä Terrihüttä und ämänä fainä Zmorgä, simmär mit Tee i üsnä Fläschä uf dEtappä 12 ufbrochä. SWättär häts sehr guät mit üs gmaint und mir händ dä erscht Tail vom Tag blauä Himmäl und Sunnäschii gnossä.

 

Übär Stock und Stai ischäs über die wundärschön und fast endlosä Greine Ebeni gangä. Nochdemär mehreri Bachläuf überquert und irgändwo undärwägs Kantonsgränzä vo Graubündä is Tessin passiert händ, hämmär üsi wohlvärdiäntä Zmittagspausä idä Capanna Scaletta iglait. 

Währändäm Zmittäg händ sich denn no ä paar Staiböck zu üs gsellt und fliessig dä Felsä abgschläckäd. Mir händ denn dä schö Ussichtspunkt verloh und sind Richtig Tal abgstigä.

Nochäm stailä Abstig bis id Alp abä, wos ä churzi Trinkpausä geh hät, ischäs denn gmüätlich, a Wassärfäll värbi, stetig abwärts gangä. Churz vor Campo sind denn abär ufzmol rasant dWolkä ufzogä, so dassmär churz vor Olivone innärä chlinä Höhli händ mösä Schutz suächä. Noch dem chlinä Zwüschästop simmär denn abär noch 20.6 km, 631 positivä und 1'878 negativä Höhämeter i 6 Stund 29 Minutä in Olivone acho.

Am nöchschtä Tag hämmär üsi Bai vom Abstig am Vortag scho bitz gspührt. Trotzdem simmär wiitär durs schönä Bleniotal ufbrochä.

Dä Wäg hät üs värbii a Wiesä und Rebä entlang am Brenno dur chlini Dörfli gführt und isch bi wiitäm nümä so streng gsi wiä diä zwai Täg vorhär. Däfür umso haissär! Bi jedem Höhämetär wommär abäglauffä sind, ischäs wiedär no wärmär wordä, so dassmär immär meh is schwitzä cho sind. Trotzdem simmär rächt schnäll vorwärts cho und händ mit ä paar (Abchüäligs-)Pausä hi und do Biasca noch 26.0 km, 377 positivä und 966 negativä Höhämeter i 6 Stund und 7 Minutä ärraicht und glücklich üsän Znacht ufdä Terassä gnossä.

Zwüschästand: 243.1 km, 12'936 Höhämeter+, 76h 58min