Frankfurt und so

Da isch än sehr produktivä Herbst gsi und i zwai Wuchä isch scho Wiähnacht! Agfangä häts mitäm letschtä Augustwuchäend, wommär sGotti uf Paris entfüährt händ. Döt hämmär nöd numä die offiziällä Sehenswürdigkaitä gseh bi pärfäktäm Wättär wiä immär zParis, sondärn händ dankäm Hugo ä Privattour dChamps-Élysées därab im Cabriolet gmacht. Am Obäd simmär denn sogar no is Moulin Rouge. SGotti isch so i knapp 2 Täg ufäm Eifälturm gstandä, hät ä Bootstour ufdä Seine gmacht, dä Louvre bsuächt, dUssicht vodä Sacré Coeur gnossä, dä Arc de Triomphe bestigä, dNotre Dame agluägät und isch denn gmüätlich mitäm Flügär haichauffiert wordä. Wött mi öpärt als Raisefüährär buächä? I bin jo ersch 5 Mol ufäm Eiffelturm gsi ;-) Abär Paris isch äbä immär wiedär schön.

Am Wuchäend vom 4. Oktober bini denn schnäll id Schwiiz graist, zum bim Drü-Ländär Marathon mitzmachä. I bi numä dä Viertälmarathon, also chli meh als 11km grennt. Dä Tag hät abär denkbar schlächt und mit viel Rägä und Sturm agfangä. Trotzdem hani mi tapfär zLindau an Start gstellt und dä Chälti trotzt.

SWättär hät denn zum Glück nodisno uftuä und bisi zBregenz im Ziel gsi bin, hät sogar dSunnä gschunnä.

Däzuä chunt, dassi natürli mini Joggingschuäh zFrankfurt loh han und drum mit altä han mösä rennä. Trotzdem bini ächli schnällär als letscht Johr zFüssä gsi.

Mitte Oktober hani denn Bsuäch vom Mami und Papi usdä Schwiiz übärcho. Zersch häts drum än Stadtrundgang geh mit aschlüssändär Curry Wurst. Am nöchschtä Tag ischäs denn ab in Taunus gangä. Da isch sGebiät mit dä nöchscht grössärä Hügäl, sus isch jo Frankfurt aifach numä Flach. SWättär hät supär mitgspielt und mir sind gmüätlich zum altä Römärkastell Saalburg vo Bad Homburg us glofä.

Endi Oktober hani dMöglichkait gha vodä Dütschä Bundäsbank us än Vortrag idä Europäischä Zentralbank zbsuächä. Da hani natürli sofort gnützt, willmär sus döt nöd aifach so inäspaziärä chan, dos streng bewacht wird.

Und denn ischdä Sträss losgangä. Für aimol hani kai Ziit für irgändwelchi Usflüüg odär Raisä gha, sondärn hanmi voll und ganz uf mini Masterarbät mösä konzäntriärä, woni denn am 16. Novembär erfolgriich igraicht han. :-) Jetzt värbringi  grad no mini letscht Wuchä zFrankfurt im Praktikum, bevori churz vor Wiähnachtä haichum. DUssicht vo mim Büro värmissi scho jetzt!

Trier und dä Todäsangst-Pfad

Hui, diä Ziit goht so schnäll värbii. Vor zwai Wuchä hätmi dä Tino bsuächt und mir sind Trier go uskundschaftä. Da isch ä Städtli im Moseltal wo wiedär ämol vor 2000 Johr im Bsitz vodä Römär gsi isch. Nochdemär üs usgibig idä Genussgesellschaft (ä Restaurant/Kafi) gstärkt händ, hämmär mit dä Entdeckigstour chönä afangä.

Trier ällai wär für ain Tag abär zwenig gsi, drum simmär deno direkt wiitär, tüüfär is Moseltal inä gfahrä. Döt simmär bimänä chlinä Dörfli usgstigä und händ üs uf dä Todesangst-Rundwäg traut.

Todesangst hämmär zwor nöd gha, abär wär Höhäangst hät, dä sött villicht nöd grad do ufä laufä. Dä Pfad sälbär isch abär nöd bsundärs aspruchsvoll. I bi numä mit Ballerinas undärwägs gsi und han da guät chönä machä.

Näbädäm Todesangst-Fahnä ischäs grad abä gangä. Ufäm Fötäli gsehtmär da nöd amol so guät. Wennmär abär uf dStross links unä im Eggä achtät, waissmär dassmär do chli wiitär obä gstandä sind.

 Nochdemmär dUssicht gnossä händ, simmär denn wiedär abägloffä und uf Koblenz go Znacht ässä, bevormär zrugg uf Frankfurt go schlofä sind.

Elsass

Mittlärwiilä bini erneut zFrankfurt. Dasmol imänä Praktikum bidä Dütschä Bundäsbank. Da hät mi abär natürli nöd dävo abghaltä ächli umäzraisä. 

Dä Summär isch sehr haiss do. Ziitäwiis häts Temperaturä übär 40 Grad geh. Zum Glück isch sBüro klimatisiert. Willi abär innärä WG grad undäräm Dach wohn, ischäs döt so richtig haiss wordä. DLuft vo dussä, wo numä no 38 Grad gsi isch, isch mir denn scho chüäl vorcho. Do dä Erik grad idä Stadt gsi isch, simmär gflüchtät und am Wuchäend sElsass go aluägä.

Dä erst Stopp hämmär zNancy gmacht. Da isch ä schös Städtli mit mega imposantä, altä Bautä.

Willi am Morgä no gschaffäd han und mir drum ersch am Mittag abgfahrä sind, isch dä Tag nochäm Städtli aluägä au scho umä gsi. Mir händ idä nöchi vom Hotäl ä beläbts Gässli mit ganz vielnä Restaurants gfundä, wommär sehr guät Znacht gässä händ.

Am Samstig simmär quer dur sElsass gfahrä, agfangä mitärä supär Abchüälig uf Le Hohneck. Döt uf 1363m hämmär näbädärä supär Ussicht, au di agnehmä Temperaturä vo numä 24 Grad gnossä.

Denn ischäs abä uf Eguisheim, inä härrlichs kitschigs Elsassärdörfli, gangä. Do hämmär zersch ämol mösä ä Glacé ässä, wills scho wiedär übär 30 Grad gsi isch.

Als nöchschts isch Colmar ufäm Raisäplan gstandä. Da isch scho ä grössärs Städtli, abär nöd wenigär kitschig und schön.

Wills a dem Tag nöd scho gnuäg typisch elsässerisch gsi isch, simmär vo Colmar us quer dur dRäbbärgä gfahrä und händ bim Värbiifahrä no mängi andäri winzigi Dörfli gseh. Übrigäns wär sElsäss ä pärfäkts Gebiät zum go Velo fahrä!

Zum krönändä Abschluss vom Tag, simmär denn no sChâteau du Haut-Koenigsbourg go aluägä. Da Schloss isch im 30-jöhrigä Chriäg im 17. Johrhundärt zerstört und ersch afangs 20. Johrhundärt wiedär ufbaut wordä. Däfür häts baidi Wältchriäg unversehrt übärläbt.

Am Sunntig simmär nochämnä usgibigä Zmorgä im Hilton go Strasbourg erkundä.

Au do isch alläs typisch elsässerisch baut und gseht mega schön us. Wäg dä haissä Temperaturä, wo sogar fascht bi 40 Grad glägä sind, simmär froh gsi, wennmär irgändwo ä Schattäplätzli gfundä händ. Mir sind denn au aini vo dä wenigä gsi, wo di vielä Stägä uf sMünstär ufägloffä sind zum go dUssicht gnüssä. 

Nochämnä Churzbsuäch bim europäischä Parlament (äs git laidär kai Füährigä am Sunntig), hämmärs üs schlussendli imänä mega schönä Park mit Härrähuus gmüätlich gmacht und sind denn wiedär zrugg uf Frankfurt gfahrä.

1 Tag Nizza

Üs häts am Mittwoch vorärä Wuchä id Wärmi zogä. Idä Schwiiz häts dä ganz Tag gschiffäd. Do ischäs grad ideal gsi, dass dAndrea und i am Mami än Übärraschigsusflug uf Nizza gschenkt händ. 

Am Morgä früäh simmär vodä Andrea zFribourg an Genfer Flughafä gfahrä. Nochämnä Kaffi isch denn srotä losgangä, will sMami bis döt anä no nöd gwüsst hät, wohi dassäs goht. Mir händ no chli chönä Värwirrig stiftä, idemär vor sfalschä Gate ghockät sind. Abär spötästäns bim Boarding ischäs klar gsi und mir sind ab uf Nizza düst.

Üs hät ä sensationälls Wättär ärwartät. Mit Crèpe idä Hand und Erdbeer vom Markt im Gepäck, hämmär üsi Besichtigungstour gstartät.

Scho noch churzer Ziit ischäs richtig haiss wordä. Zum Glück händ dAndrea und i a alläs denkt und churzi Hosä und ä Röckli für sMami ipackt.

Nochämnä fainä Zmittag und ämnä groosä Glacé simmär nochli durs Städtli gloffä, bevormärs üs am Strand bequem gemacht händ.

DBadhosä hämmär natürli au ipackt. SMeer hät scho 19 Grad gha. Allerdings häts a dem Tag rächt gwällät, so dass vo gmüätlichäm Badä kai Red hät chönä si. Mir sind trotzdem alli is Wassär, sogar sMami!

Denn isch dä Tag au scho ummä gsi und mir sind mit viel Sunnästrahlä und Erinnärigä im Gepäck wiedär zrugg noch Genf gflogä und vo döt hai uf Wolfhaldä gfahrä. 

Frankriichtrip 3/3

Nochärä viel zchurzä Nacht ischäs am nöchschtä Morgä wiitär gangä. Als Dank, dassmär bidä Kollegin händ chönä schlofä, hät dAndrea aber zersch ämol ganz viel Schoggieili ufäm Tisch vertailt. Denn simmär mit dä Emie, dä Kollegin vode Andrea, wiedär ächli in Südä, zudä Gouffre de Padirac gangä. Da isch ä wundärschöni Grottä, wommär zersch mitämnä Bötli beträtä muä, bevormär dinnä mitämnä Guide umälaufä chan. Leider isch fötälä verbotä gsi. Uf google gits abär jedi Mengi Foti dävo.

Dos Ostersunntig und schö Wättär gsi isch, hämmär beraits im Vorfäld reserviert und sind scho am 9i döt gsi. Äs hät denn au scho ä chlini Schlangä gha, abär dank dä Reservation hämmär grad inä chönä. Wommär wiedär usä cho sind, häts denn andärsch usgseh. DSchlangä isch scho riesig lang gsi, obwohls ersch halbi 11i am Morgä gsi isch. Und au bim Reservationshüsli händs müäsä astoh. Mir sind also genau zur rächtä Ziit döt gsi. Schnäll simmär wiitär zum nöchschtä Stopp: Rocamadour.

Da isch ä mittälaltärlichs Städtli wo in Felsä ghauä wordä isch. Dä Mittälpunkt bildät ä riesigi Chiläalag, wo sich übär mehräri Stockwärk erstreckt. Drum isch Rocamadour bis hüt än katholischä Wallfahrtsort. Nochäm Zmittag adä Sunnä simmär ä paar Metär wiitär zum Rocher des Aigles, än Vogälpark gangä. Wiä dä Namä sait, häts vor alläm viel Adlär und Adlärähnlichs gha. Abär au Ülä, Uhus und Papagaiä hämmär entdeckt. Zum Schluss häts ä grossartigi Flugshow geh, wonni mir denn au min erstä Sunnäbrand das Johr gholt han.

Denn hämmär scho üsäs letschtä Ziel vom Tag agstürät. Mir sind wiedär chli nördlichär uf Collonges-la-Rouge gfahrä. Döt acho, simmär ohni nohzdenkä an nöchschtä Parkplatz gfahrä. Dä isch abär völlig übärfüllt gsi. DAutos händ bereits a Ortä parkiert, wo nöd als Parkluckä vorgseh wär. Wills abär scho 5i gsi sich, hämmär erneut Glück gha. Di erschtä Bsuächär sind beraits gangä und mir händ grad sofort än Platz värwütscht.

Da Dörfli isch äbäfalls usäm Mittälaltär und äbäfalls sehr guät ärhaltä, wiä diä vielä andärä wommär scho gseh händ. Allärdings machts öpis bsundärs: Äs isch komplett us rotäm Sandstai baut und hät üs bi dem schönä Wättär scho vo wiitäm entgägä glüchtät. Und denn simmär scho zum zwaitä Mol dä Wäg uf Uzerche aträtä. Willmär no früäh dra gsi sind, hät dEmie mit üs churzärhand ä Stadtfüährig dur Uzerche gmacht.

Am Obäd häts än fainä Znacht (4-Gänger!) geh und mir sind mit vollä Büch und wiitärä Französischkenntnis go schlofä. Am nöchschtä Morgä häts den ghaissä Abschied neh und mir sind zrugg Richtig Schwiiz gfahrä. Abär natürli nöd diräkt. ;-) Churz vor Clermont-Ferrand häts ä riesigi Vulkanchetti mit übär 80 erloschänä Vulkän, wommär natürli go aluägä sind. Mir händ üs dä höchschti, dä Puy de Dôme, usgsuächt und sind ufäm Chemin de Muletiers ufägloffä. 

Scho am Fuäss vom Vulkan isch üs än iisigä Wind entgägä cho. Zudem ischäs numä no 3 Grad gsi. Noch 50 Minutä mit Pausä, simmär denn ufäm Gipfäl acho und äs hät üs fascht wiedär obä abäblosä. Do uf 1465 Meter häts sogar no chli Rästschnee gha. Abär dUssicht isch supär gsi, wenn au no chli karg. Do obä häts sogar no Ruinä vomänä Merkurtempäl us dä Römärziit gha. Wiedär ämol 2000 Johr alt. Diä sind scho übärall.

Nochämnä kurzä Rundgang simmär denn dä Rückwärtswäg aträtä. Äs isch aifach zchalt gsi. Dunnä acho, hämmär no äs letschts Mol üsäs Glück erfahrä. Dä Parkplatz isch scho übärvoll gsi und dLüt händ beraits adä Stross ufä und abä parkiert. Wiedär ämol simmär zur rächtä Ziit am richtigä Ort gsi. Zfriedä simmär di letschtä 4.5 Stund zrugg id Schwiiz gfahrä, i han dAndrea zFribourg abgladä und bin denn spoht am Obäd zWolfhaldä acho.

Frankriichtrip 2/3

Churz nochäm 7i ischäs am nöchschtä Morgä scho losgangä zudä Pont du Gard; äs 2000 Johr alts Äquadukt. Da isch allerding aifacher gsait, wiä gmacht gsi. Mir sind also immär brav dä Schildär gfolgäd und händ denn au dä Parkplatz gfundä. Numä, hetämär 18 Euro Itritt söllä zahlä! Da isch üs aidütig zviel gsi. Also simmär ufdi andär Siitä vom Fluss, zum go luägä, öbs döt andärsch usgeht. Leider isch döt sglichä Untärnehmä gsi und hät wieder 18 Euro verlangt. Zudem händsäs gschafft, dass wiit und brait kai andäri Parkmöglichkeit umä und däzuä alläs abgschottät gsi isch, so dassmär au nöd anä laufä händ chönä.

Mir händ üs denn übärlait, dassmär so ä grossäs Äquadukt gar nöd übärall chan absperrä und sind uf Parkplatz- und Routäsuächi. Fündig wordä simmär denn chli wiitär wäg ufämnä privatä Hotälparkplatz. Wills no früäh am Morgä gsi isch, hämmär üsäs Auto trotzdem döt anä parkiert und sind losmarschiert.

Nochämnä Wili isch dä Wäg immär wenigär zgseh gsi. Allerdings hämmär alti Wandärwägwiisär gfundä, wo zudä Pont du Gard dütät händ. Bevormär mit 18 Euro abzockt wordä isch, hätmär do also mol chönä gmüätlich und gratis anäspaziärä. Undärwägs sind üs denn äs paar Verbotstaflä und ä Abschrankig für Autos begägnät, wommär aifach, mangels Französischkenntnis, ignoriert händ. Dä Wäg hät üs übär Stock und Stai, zwüschäd Räbbä und Oliväbäum und dä kapputtä Wiitärfüährig vom Äquadukt durägfüährt bis kain Wäg meh do gsi isch. Äs hät ächli usgseh wiä bi üs ufdä Alp. Dankäm Telefon simmär aifach immär wiitär Richtig Pont du Gard gloffä und irgändwenn hämmär dä Usblick gha.

Vor üs isch allerdings ä Klippä gsi, so dassmär nöd abä händ chönä. Plötzlich sind üs abär Lüt entgägächo und mir sind aifach denä noglauffä.

Und denn simmär dävor gstandä. Um üs umä häts au andäri Bsuächär gha, allärdings alli mit Audioguide. Näbdäm Äquadukt sind Taflä zudä Entstehigsgschicht gsi mitäm Logo vodem Undärnehmä druf, wo üs vorhär dä Zuägang so schwär gmacht hät. Mir sind also ohni Zahlä zudä Pont du Gard cho. Mi cha so öpis grossäs würkli nöd völlig abschottä. Zfriedä simmär zrugg zum Auto gloffä und sind wiitär noch Nîmes gfahrä.

Willmär am Morgä so früäh losgfahrä sind, ischäs trotz dä Wandärig no nöd ämol Mittag gsi. DSunnä hät üs scho dä ganz Tag beglaität. Jetzt isch abär serscht Mol Feriästimmig ufcho und äs isch richtig warm wordä. Döt wos nöd gwindäd hät, hetämär sogar di churz Hosä chönä bruchä.

Nîmes isch ä härzigs Städtli mit südländischäm Flair. Vo do wäräts au nur no öpä 50 Minutä as Meer abä. Übärall wommär anägloffä sind, isch aifach alläs alt gsi. Äs stönd etlichi Ziitzügniss usäm römischä Riich umä, wo je noch dem meh oder wenigär intakt sind. SMaischte isch aifach mindästäns 2000 Johr alt. Schwäräs Härzäs hämmär Nîmes denn verloh und sind in Nordwestä ufägfahrä.

Dä nöchst Stopp isch la Couvertoirade gsi. Da chlinä Dörfli usäm 11. Johrhundert isch bsundärs, wills niä übär dStadtmuur usgwachsä isch. Drum findätmär do kai neui Hüsär. Ussärhalb vodä Stadtmuur sind numä di altä Höf, Land und Wiesä. Und denn chunt lang nüt meh. SAinzig neuä idä Nöchi isch dä Parkplatz.

SNöchschtä uf üsärä Lischtä isch sViaduc de Millau gsi. Da isch di längst Schrägseilbrugg vodä Wält. Mir sind schnäll drübär gfahrä, händ däbi dä wahsinns Usblick gnossä und händ denn äs paar Fötäli gschossä. DWolkä sind immer dichter wordä, je meh mir in Nordä ufä gfahrä sind. Äs isch abär nomol äs Dörfli uf üsäm Tagäsplan gstandä.

Saint-Cirq-Lapopie isch ä alts Mittälaltärdörfli, wo hoch ufärä Klippä baut wordä isch. Viel meh däzuä zsägä gits aigäntli nöd, äs isch aifach mega härzig, alt und schön. 

Chum simmär denn losgfahrä, häts au scho agfangä tröpflä und rägnä. Mir sind a dem Obäd no uf Uzerche zunnärä Kollegin vodä Andrea gfahrä, wo au Aupair in San Francisco gsi isch. Döt simmär noch viel französisch schwätzä zfriedä is Bett gsunkä und händ Energie für dä nöchschti Tag tankät.