London

Äs Grüässli vo London, wo ich und dä Tino letscht Wuchäend schnäll gsi sind :-) Viel Liächtli agluägät, Phantom of the Opera und Lion King als Musical gseh und viel Gäld usgeh...

Ulmer Spatzä

Am erstä Adventswuchäend ischäs wiedär so wiit gsi: Mir sind an Christchindlimarkt uf Ulm. Bereits am früähnä Morgä, hämmär scho di erscht Action gha. Mir sind pünktlich abgfahrä, wo plötzlich dä Tobias aglütät hät. Er hegi verschlofä und dä Zug värpasst. Das isch öppi am 6.25 gsi. Dä Car wär abär scho am 6.50 gfahrä. Dä Tobi isch denn zumänä Taxi gseklät und mir händ nüt meh vo em ghört. Bibbernd (au wäg dä Chälti) hämmär denn zRorschach uf dä Car gwartät. Am 6.45 isch denn au scho ainä cho. Dä Tobi isch zu dem Ziitpunkt immär no nöd zäraichä gsi. Zum Glück isch dä Car abär anäs andärs Ort gfahrä und sWartä isch wiitär gangä. Churz druf abä isch denn au scho dä nöchschti Car cho, abär au dä hät än andärä Zielort gha. Dä dritti Car isch denn churz nochäm 10 vor uftaucht und gross mit "Ulm" agschribä gsi. Mir händ scho denkt, dä Tobi schaffts nöd und mir mönd ohni en go. I dem Moment chunt abär ä Taxi zum Vorschii. Dä Tobi höcklät seeläruhig döt innä und isch am Pläuderlä. Mir sind also alli zemä gsi und äs hät chönä losgoh.

ZUlm simmär zersch an Wiähnachtsmarkt und i dLädäli zum üs Ufwärmä. Dä Markt isch rund ums Ulmer Münster glägä gsi, ä grossartigi und kitschigi Kulissä. Noch ä paar Punsch und Glüähwii simmär am Obäd denn is Hotel. Mir händ jo schliässlich wellä fürd Spatzäjagd fit gsi. SWohrzaichä vo Ulm isch dä Spatz und das wäg dem:

Anno dazumal vor vielen Jahren
Ist den Ulmern folgendes widerfahren:
Zu allerlei Bauten in der Stadt
Man Rüst- und Bauholz nötig hat’,
Doch wollt es den Leuten nicht gelingen
Die Balken durchs Tor hereinzubringen,
Und doch war reiflich die Sach’ überlegt
Das Holz in die Quer’ auf den Wagen gelegt;
Das Tor war zu eng, die Balken zu lang,
Dem Stadtbaumeister ward angst und bang.

Viel gab es hin und her zu sprechen:
Und ungeheures Kopfzerbrechen,
Ja, selbst der hohe Magistrat
Wusste für diesen Fall nicht Rat,
Er mochte in alle Bücher sehen,
Der Casus war nirgends vorgesehen,
Der Bürgermeister selbst sogar
Hier ausnahmsweise ratlos war.
Ihm, der doch alles am besten weiß,
Machte die Sache entsetzlich heiß.

Und stündlich wuchs die Verlegenheit,
Da – begab sich eine Begebenheit
Von den klügsten einer ein Spätzlein schauet,
Das oben am Turm sein Nestlein bauet,
Und einen Halm, der sich in die Quer’
Gelegt hat vor sein Nestchen her,
Mit dem Schnäblein – und das war nicht dumm
An der Spitze wendet zum Nest herum,
„Das könnte man“, ruft der Mann mit Lachen,
„Mit dem Balken am Tore ja auch so machen!“.

Man probierts und es ging. – Den guten Gedanken
Hatten die Ulmer dem Spätzlein zu danken:
Sie stünden wohl heute noch an dem Tor
Mit dem balkenbeladenen Wagen davor,
Oder hätten, ohne des Spätzleins Wissen,
Gar den Turm auf den Abbruch verkaufen müssen.
Zum Danke dem Spatzen ist heut noch zu schauen
Hoch am Münster sein Bild in Stein gehauen:
Auch seitdem beim echten Ulmerkind
Die Lieblingsspeise „Spätzle“ sind.

(Carl Hertzog, 1842)

Dä Andrea erän Kommentar: "Diä chönd doch nöd so blöd gsi si?!?"

Mir händ üs denn abär trotzdem ufd Suächi nochdä Spatzä gmacht. Mithilf vo geocaching hämmär üs än schönä Stadtrundgang abägladä, wo üs ainärsits zudä Spatzä und andärärsits zu allnä Sehenswürdigkaitä vodä Stadt gführt hät. Mir sind denn au dur villi härzigi Gässli, a altä Hüsli und am schiäfschtä Hotel vodä Wält värbiigloffä. Denn simmär no schnäll ufs Münstär ufäghüpft (also übär 400 Stufä und das numä i di erst Etagä) und händ di kitschig Christchindlimarkt-Stimmig vo obä agluägät. Schlussendli hämmär no schnäll dä Schatz gsuächt und gfundä und sind denn pünktlich bim Hotäl gsi, damitmär wiedär händ chönä haifahrä.

Gastpost von Andrea: English School

Mini Schuel in Cambridge isch super gsi und het en riise Garte gha wo es paar Lehrer au als Klasseruum verwendet hend, die Stunde sind emlich zimlich frisch im chüele England gsi...
D Schuel selber isch e chli usserhalb vo Cambridge gsi, gnauergseit in Girton das isch öppe 3 km vom Stadtzentrum entfernt. Mini Gastfamilie het fast ide hälfti gwohnt und so hani jede Tag en elendslange Wäg gha zum id Schuel cho wo i aller morgefrüe am 09:15 agfange het. :-) Zersch bini miteme chlaprige alte eingängige Velo woni vo de Gastfamilie han dörfe uslehne id Schuel gfahre. Mit dem klapprige Gstell hani gademol 8 min brucht über di holprig Stross mit gaanz vil Konzentration, denn in England fahrt mo uf de linke Strossesiite. 2 Wuche lang het mich de Drohtesel überall hi brocht woni han wele und den het er amene Obet ufzmol en Platte gha und fertig isches gsi mitem turboschnelle Transportmittel. Vo do ah hani mich uf mini Bei möse verloh und das heisst jede Morge 25min laufe, wa gaanz schön langwilig isch so elei. Schlagartig het mini pünktlichkeit ide Schuel ufghört was aber gar nöd eso schlimm gsi isch, denn i bin nie di letscht gsi.. ein Schüeler us China isch jede Tag mindestens e halb Stund zspot oder gar nöd cho. Dodegege sind mini 5 Minütli verspötig gad nünt gsi. Eimol hani mi uf de Weg gmacht und bin scho es paar Minütli glaufe, do gsehni 2 Studente ade Busstation warte. All 20 min sött noch Fahrplan en Bus cho und wil eini vode Studentinne scho 10 min am warte gsi isch hani mich gad zu ene gsellt und han mit ene uf de Bus gwartet, denn er het jo ide nögste paar Minute möse cho. Doooch das isch England und nöd d Schwiiz und somit sind di öffentliche Verkehrsmittel nöd immer gaaanz eso pünktlich wie dihei. Mir hend gwartet und gwartet und gwartet und es het sich eifach kei Büsli blicke loh bis mer gseit hend jetzte zehlet mer bis uf Hundert und denn laufet mer los. Doch au noch dem Zahlezele het niemert a üsere schöne Haltistell gstoppet und üs ufglese, dodebii sind mer doch scho meh als 40 min am warte gsi. Mir hend üs scho wele parat mache für en Marsch zur Schuel, wo de Bus imene enorme Tempo abraust chunt und fast a üs 3 hübsche verbigruschet wer. Woner den es paar Meter wiiter gstoppet het sind mer überglücklich in absolut leere Bus igstige und hend die schön und churzwilig Fahrt bis zur Schuel gnosse. Mit ca. 50 min verspötig sind mer denn i üsi Klassezimmer gschliche und hend üs gschwore nie meh amene Morge de Bus id Schuel zneh.

Liebi Grüässli vode Andrea

Gastpost von Andrea: Tschüss Schwiiz - Hello England

Am Suntig de 30. September am Morge am 9ni bini zGossau in Zug richtig Züri Flughafe gstige. So hani bis zu mim Flug am 12i gnueg ziit gha zum mis Gepäck ichecke, dur d Personekontrolle laufe ( wo notürlich wie immer piepset weni durelauf ) und gmüetlich zum Gate schlendere. S Flugzüg isch pünktlich gstartet und ab in Himmel überd dWolke us is schönste Sunnewetter düset. Binere Höchi vo 10363m über Meer e Gschwindigkeit vo 811 Km/h und enere Temperatur vo -53°C hani e super Ussicht uf Frankrich und Paris gha. Über England hets notürli gaanz vili Wolke gha. Denn isches plötzlich uuh schnell abwärts mit einige Kurve in Sinkflug gange und under di dick Wolkedecki und tadaaa do isch London soo nöch und inere super Perspektive. Doch leider bini e chli langsam gsi zum de Fotiapparat fürekrame so hani nume es paar Föteli vode Ortschaft direkt bi Heathrow. D Landig isch zimlich rumplig und hart gsi. Mir sind recht duregschüttlet worde, doch alli sind heil acho. ;-)

Nochere 3 Stündige Busfahrt noch Cambridge bini denn am halbi 6i endlich bi minere Gastfamilie acho und miteme Teeli verwöhnt worde.

LG Andrea

1. August

Dä zwait und dritt Tag vo üsärä Velorais hämmär au guät übärstandä. DAndrea hät zwüschätinnä au mol mösä trätä, wills Elektrobike so ab 22 km/h nümä undärstützt isch und mir aifach tschnäll gfahrä sind ;-) ZLinthal hämmär im Bed & Breakfast übernachtät. Am nöchschtä Tag simmär denn in Klausä ufä go sünnälä, währänd dä Papi ufägstramplät isch. ZBrunnä hämmär üs denn no schnäll di letschtä zwai Zimmär idä ganzä Region gschnappt (so wiä mir umätelefoniert händ, muän da fascht so si...) und sind am Obäd denn sDorffäscht und sFürwärk go gnüssä. Am nöchschtä Tag sind sMami und dä Papi wiitärgradlät und ich und Rea sind wiedär hai (mitäm Zug).

Bschisserin

Hüt morgä hämmär üsi Velo gsattlät und sind übär alli Hügäl via Trogen, Teufen und Appenzell uf Urnäsch gfahrä. SWättär isch perfäkt gsi; schön bewölkt, abäd ohni Ragä. ZUrnäsch hämmar än fainä Zmittag bidä Susi übärcho. Vo do hämmär üs (ab do mit dä Andrea) zudä letschtä Stigigä Richtig Hemberg ufgmacht. Währänd mir üs undär dä brüätändä Nomittagssunnä abgstramplät händ, isch dAndrea di maischti Ziit im Gräs glägä und hät gsünnälät. Tja, sie hät glaubs ächli Schiss vor denä vielnä Hügäl übärcho und hät sich kurzärhand ä Elektrovelo usglehnt. Zudem hät sie denn no mit grossär Klappä gsait, dass da jetzt gar nöd so streng gsi seg. Obwohl sie zu alläm anä ersch am Nomi mitgfahrä isch. I wör sägä: dopplät bschissä! Mir sind abär au guät, abär müäd acho. Übrigäns: Dä Papi ziäht (fascht) sganze Gepäck im Ahengär, ohni Elektrobike...

Lindau

Am Sunntig isch asä schö Wättär gsi, mir händ grad dVelo gschnappäd, dBadhosä aglait und sind an Bodäsee abä. Laidär sind denn Wolkä cho, so dass usäm Badä zwor nüt wordä isch. Wommär denn abär zLindau acho sind, hät wiedär dSunnä gschunnä. Nochdemär durs sStädli gschlendärät sind, simmer denn mitäm Schiff undäm Zügli wiedär hai. Supär schö gsi! 

Autopannä

DStory hindäräm Fötäli: Uf dä Fahrt id Toscana isch dä Motor ufzmol zhaiss gsi, mir sind abgschläppt wordä und idä Garage isch alläs wiedär i Ornig gsi. Schlussendli simmär noch 3 Stund Zwangspausä doch no hail zVada acho. Leider hani sKabel für dKamera nöd däbi gha, drum chunt da ersch jetzt.

Velotürli

Gescht hämmär ä Velotour gmacht. Äs isch undär starkäm Sunnäschii ufägangä uf Riparbella. Wommer denn dobä gsi sind, hät dSunnä abär langsam noloh, heti au umgekehrt dörfä si. DUssicht hämmär abär trotzdem gnossä. SWättär hät denn abär doch no mitgspielt. Chum simmär ufäm Zältplatz acho und richtig anäghockät häts agfangä tröfplä. Und ä halb Stund spötär häts abäloh wiä gstört.
 

Vampir zVolterra

Wills das Johr idä Toscana nöd äso schös Wättär isch, simmär uf Sinea und Volterra gangä, anstatt dä ganz Tag im Zelt si. Siena isch härzig, wiä alli Städtli und Dörfli idä Toscana. Allerdings gsehtmär, dass dLüt döt sehr viel Gäld gha händ. DFassadä sind ungwöhnlich pompös und dHüsär sehr höch baut. Zudem gits än Dom, ä Burg/Festig und was halt sus no däzuä ghört. Schön inszeniert isch dä Palazzo Pubblico. Nochdemär ä chlisäs, schmals Gässli abäglauffä isch, macht sich än riisigä Platz uf. Döt findät sitäm Mittelalter dä Palio di Siena statt; ais vodä härteschtä Pferderennä vodä Wält (saitmär uf all Fäll).
Uf dä Haifahrt hämmär denn no än churzä Abstächär uf Volterra gmacht. Sit dä Roman "New Moon" us dä Twilight-Raihä (Vampir!) usächo und dä denn verfilmät wordä isch, bsuächät vieli da Städtli zum dSchauplätz vom Showdown im Roman und im Film go aluägä. Tja, Fählalarm: Mir händ gsuächt und gsuächt und gsuächt und... ...nüt gfundä. Dä gross Platz mitäm Brunnä, wommär im Film gseht, gits nöd. Dihai hämmär denn googlät und tatsächlich: Will anschinänd dKulissä schönär gsi isch, hätmär dSchlusszenä churzerhand in Montepulciano draiht. Voll dä Bschiss, äs git also doch kai Vampir in Volterra!

Europapark

Glück gha! Am Mentig isch sWättär schlächt gsi, am Mittwoch ischäs schlächt gsi und däzwüschät sind mir in Europapark. Am Zischtig hämmär strahländ blauä Himmäl, Sunnäschii und agnehmi Temperaturä gha. Ersch am Nomittag sind langsam dWölkli cho und grad wommär üs Richtig Usgang ufgmacht händ, häts agfangä tröpflä. Meh Glück hetämär gar nöd chönä ha. Däfür hämmär au äs bitzli mösä astoh, abär mir händ alli grossä Bahnä (und ä paar chlini) gschafft und händ no gnuäg Ziit gha zum üs mit alläm möglichä Ässä vollzstopfä ;-)

Savognin

Hui, das isch knapp gsi. I bi scho soo lang nümä wäg gsi, dassi fascht vom Färnweh ghailt wordä wär! Zum Glück sind denn dSkiferiä dSavognin däzwüschät cho :-)
Mir händ vier Täg supär genials Wättär gha: blauä Himmäl, Sunnäschii und numä am erschtä und am letschtä Tag värainzälti Miniwölkli. Und natürli Schnee! Komischärwiis häts bi dem supär Wättär fascht kai Lüt gha. Mir sind vielfach ällai ufdä Pischtä gsi (ussärt am Samstig Morgä). DPistä sind traumhaft gsi. Gägä sTal ischäs am Nomittag abär rächt sulzig wordä, wills asä warm (10 Grad odär so) gsi isch. Däfür hämmär dLigästüähl usgnutzt. ;-) Gwohnt hämmär grad näbäd dä Talstation im Cube. Wills ä Sporthotel isch und zu denä ä Sportgschäft ghört, hämmär Vergsünstigungä gha bim Miätä und däzuä häts gratis Grät geh zum Usprobiärä. Am Donnschtig hani drum Ski gmiätät, zum Luägä öbis noch chan (i läb no!) und am Fritig Nomi simmär go Snowcycle fahrä. Da isch aigäntli ä Velo mit Ski unä dra statt Rädär. Ussärt ä paar chlinä Unfäll isch da mega luschtig gsi, mir händ alli Schlittlär lockär übärholt. Tja, und denn sind am Samschtig Nomi langsam chli meh Wolkä cho und mir sind wiedär haigfahrä.