Am 5i am Morgä isch beraits Tagwach gsi und mir sind mit Zug und Postauto uf Wildhuus gfahrä, wommär am 2. August üsi 4. Etappä gstartät händ. Wommär normalärwiis Ski fahräd, ischäs ufä is Oberdorf gangä, wos zersch ämol än Kaffi und ä haissi Schoggi als Stärkig geh hät.
Denno simmär frisch und muntär dä stail Wäg übär di schwarz Pischtä bis id Gamsalp gloffä, wos än früähnä Zmittag geh hät. Vo döt ischäs wiitär dä Skipischtä nogangä, numä dass alläs grüä statt wiiss gsi isch.
Ufäm Nideri, wo gar nöd so niedrig isch wiäs tönt, häts denn üsi nöchscht grossi Pausä geh. Mir händ ä mega Ussicht gnossä und üs scho mol mental ufän sehr stailä Abstig vorberaität.
Und dä isch no stailär als ärwartät gsi. Nochdemär serscht Mol wiedär ä paar Hüsär ärraicht händ, häts drum au ä wohlvärdiänti Trinkpausä hoch übäräm Waläsee geh.
Beraits mitäm afangändä Muskälkatär simmär noch nöd ganz 7 Stund, 19.3 km und 1'134 positivä Höhämetär müäd in Walästadt acho und händ üsäs Zimmär im Hotel direkt am See bezogä. Nochämnä guätä Znacht simmär denn sehr schnäll igschlofä.
Am nöchschtä Tag simmär alli mitämnä bösä Muskälkatär ufgwacht. Zum Glück isch dWandärig uf Sargans wesentlich chürzär und mit viel wenigär Höhämetär als am Vortag gsi. Nochämnä supär Zmorgäbuffet ischäs denn au scho los gangä.
Dä Wandärwäg häts guät mit üs gmaint und isch zersch ämol meh odär wenigär gradus gangä, so dassmär üsi värkatärätä Bai chli händ chönä ilaufä.
Nochämnä Znüni ufämnä Bänkli und glich no 934 positivä Höhämetär simmär denn mitämnä sehr gmüätlichä Tempo noch 16.7 km und 4 Stund 44 Minutä dSargans acho und händ üs als Belohnig än Zmittag im Schloss Sargans mit supär Ussicht gönnt.
Vo do ischäs denn au nümä wiit bis zum Bahnhof gsi, wommär am früähnä Nomittag üsä Zug haiwärts gno und üsä Muskälkatär uskurriert händ.
Zwüschästand: 87.6 km, 4'972 Höhämetär+, 27h 52 min
