Interrail: Berlin & Hamburg

Aigäntli hämmär jo nöd lang wellä in Berlin bliibä, will i scho zwei Mol döt gsi bin. Laidär isch in Hamburg abär alläs usbuächäd gsi, als dassmär zumänä värnünftigä Priis no öpis üärcho hetät. Drum hämär halt Friitig und Samstig zBerlin übärnachtät. SHostel do isch supär gsi. Äs isch scho alläs frisch azogä gsi und äs hät rächti Decki und Chüssi gha. Obwohlmär imänä achter Schlag gschlofä händ, ischäs muxmüsli ruhig gsi. Dä Tag dur hämmär dä Alexanderplatz, dä Reichstag und sBrandäburger Tor etc. abklappärät, damol alläs zFuäss.

Am Sunntig Morgä simmär denn wiitär uf Hamburg gfahrä. SHostel isch do wiedär ämol direkt näbädäm Bahnhof gsi, so dassmär schnäll üsäs Gepäck abgladä händ und grad wiitär go dStadt ärkundä sind. Zmitzt innä isch grad ä Velorennä am Laufä gsi. Spitzägruppä hämmär churz värbiidüsä gseh, bis diä abär mol im Ziel acho wäräd, ischäs zlang gangä und mir sind Richtig Hafä gstürät. 

Dä zwait Tag in Hamburg hämmär mehrheitlich idä Altstadt und im Modellisäbahn-Museum värbrocht. Do gits di grösst Modellisäbahn-Alag vodä Wält zbestunä.

Am Obäd hämmär üs denn in Zug noch Travemünde gsetzt, wommär noch ä paar Värwirrigä uf dä Fährä icheckt händ und i üsärä Kabinä go schlofä sind.

Interrail: Leipzig, Sächsische Schweiz, Dresden

Endlich ischäs so wiit gsi; üsä 3 wüchigä Trip quer dur Europa isch letschte Mittwoch losgangä. Planät isch gsi über Münchä uf Dresdä zfahrä. Mir händ üs denn churzärhand scho serscht mol umentschidä und sind go Leipzig aluägä. Willmär zDresdä denn grad au kai Untärkunft zumänä aständigä Priis übärcho händ, simmär grad zLeipzig blibä.

Am nöchschtä Tag simmär bereits am 10 vor 8i ufdä Zug uf Dresdä. Allerdings hämmär döt numä schnäll üsäs Gepäck abgeh und sind denn wiitär idi Sächsisch Schwiiz. Da isch än Nationalpark idä Nöchi mit riisigä Dolomitä. Do hämmär dä ganz Tag mit Wandärä värbrocht.

Nochdemär scho serscht mol gmüätlich imänä Doppälzimmär gschlofä händ, isch Dresdä dra gsi. Will sHotel chli wiit vom Bahnhof entfernt gsi isch, hämmär üsi Rucksäck packt und sind mit denä dStadt go ärkundä. Äs isch mega idrücklich gsi, dass hüt alläs wiedär stoht, wo nochäm 2. Wältchriäg völlig zerbombt gsi isch. Natürli hämmär do mösä ä Füährig dur dSemperopärä machä.

Am glichä Obäd hämär no dä Zug uf Berlin gno, wommär nochämnä churzä Schlummärtrunk i üsäs Bett im Hostel gsunkä sind.

Wär meh Fötäli und aktuälläri News will, chan au do go luägä: https://www.icloud.com/journal/#2;CAEQARoQcj2fgNsZNgnUFefat7SOYA;9C97D928-6317-42EC-8C88-C4C4A67CE306

Säntis aifach

Mir händ s'schönä Wättär usgnutzt und sind aimol uf dä Säntis gloffä. Agfangä hämmär in Wasserauen. Vo döt simmär gmüätlich in Seealpsee gloffä, wos au scho dä erscht Stopp geh hät. Denn is am See entlang wiitär gangä. Irgändwenn hämmär bemärkt, dass dä Abzwigär zudä Meglisalp aigäntli scho lang het söllä cho. Dä hämmär allerdings scho vor 10 min passiert und vo luutär schnorrä gar nöd bemärkt. Also ischäs wieder retour und denn däruf zudä Meglisalp gangä, wo än groosä Glacébächär uf üs gwartät hät. Über dä Schnee däruf simmer denn in Rotsteinpass go Zmittag ässä. Vo döt ischäs denn numä no än Chatzäsprung übär dä Lisengrat in Säntis gsi. Schönä 1. August!