Frankriichtrip 3/3

Nochärä viel zchurzä Nacht ischäs am nöchschtä Morgä wiitär gangä. Als Dank, dassmär bidä Kollegin händ chönä schlofä, hät dAndrea aber zersch ämol ganz viel Schoggieili ufäm Tisch vertailt. Denn simmär mit dä Emie, dä Kollegin vode Andrea, wiedär ächli in Südä, zudä Gouffre de Padirac gangä. Da isch ä wundärschöni Grottä, wommär zersch mitämnä Bötli beträtä muä, bevormär dinnä mitämnä Guide umälaufä chan. Leider isch fötälä verbotä gsi. Uf google gits abär jedi Mengi Foti dävo.

Dos Ostersunntig und schö Wättär gsi isch, hämmär beraits im Vorfäld reserviert und sind scho am 9i döt gsi. Äs hät denn au scho ä chlini Schlangä gha, abär dank dä Reservation hämmär grad inä chönä. Wommär wiedär usä cho sind, häts denn andärsch usgseh. DSchlangä isch scho riesig lang gsi, obwohls ersch halbi 11i am Morgä gsi isch. Und au bim Reservationshüsli händs müäsä astoh. Mir sind also genau zur rächtä Ziit döt gsi. Schnäll simmär wiitär zum nöchschtä Stopp: Rocamadour.

Da isch ä mittälaltärlichs Städtli wo in Felsä ghauä wordä isch. Dä Mittälpunkt bildät ä riesigi Chiläalag, wo sich übär mehräri Stockwärk erstreckt. Drum isch Rocamadour bis hüt än katholischä Wallfahrtsort. Nochäm Zmittag adä Sunnä simmär ä paar Metär wiitär zum Rocher des Aigles, än Vogälpark gangä. Wiä dä Namä sait, häts vor alläm viel Adlär und Adlärähnlichs gha. Abär au Ülä, Uhus und Papagaiä hämmär entdeckt. Zum Schluss häts ä grossartigi Flugshow geh, wonni mir denn au min erstä Sunnäbrand das Johr gholt han.

Denn hämmär scho üsäs letschtä Ziel vom Tag agstürät. Mir sind wiedär chli nördlichär uf Collonges-la-Rouge gfahrä. Döt acho, simmär ohni nohzdenkä an nöchschtä Parkplatz gfahrä. Dä isch abär völlig übärfüllt gsi. DAutos händ bereits a Ortä parkiert, wo nöd als Parkluckä vorgseh wär. Wills abär scho 5i gsi sich, hämmär erneut Glück gha. Di erschtä Bsuächär sind beraits gangä und mir händ grad sofort än Platz värwütscht.

Da Dörfli isch äbäfalls usäm Mittälaltär und äbäfalls sehr guät ärhaltä, wiä diä vielä andärä wommär scho gseh händ. Allärdings machts öpis bsundärs: Äs isch komplett us rotäm Sandstai baut und hät üs bi dem schönä Wättär scho vo wiitäm entgägä glüchtät. Und denn simmär scho zum zwaitä Mol dä Wäg uf Uzerche aträtä. Willmär no früäh dra gsi sind, hät dEmie mit üs churzärhand ä Stadtfüährig dur Uzerche gmacht.

Am Obäd häts än fainä Znacht (4-Gänger!) geh und mir sind mit vollä Büch und wiitärä Französischkenntnis go schlofä. Am nöchschtä Morgä häts den ghaissä Abschied neh und mir sind zrugg Richtig Schwiiz gfahrä. Abär natürli nöd diräkt. ;-) Churz vor Clermont-Ferrand häts ä riesigi Vulkanchetti mit übär 80 erloschänä Vulkän, wommär natürli go aluägä sind. Mir händ üs dä höchschti, dä Puy de Dôme, usgsuächt und sind ufäm Chemin de Muletiers ufägloffä. 

Scho am Fuäss vom Vulkan isch üs än iisigä Wind entgägä cho. Zudem ischäs numä no 3 Grad gsi. Noch 50 Minutä mit Pausä, simmär denn ufäm Gipfäl acho und äs hät üs fascht wiedär obä abäblosä. Do uf 1465 Meter häts sogar no chli Rästschnee gha. Abär dUssicht isch supär gsi, wenn au no chli karg. Do obä häts sogar no Ruinä vomänä Merkurtempäl us dä Römärziit gha. Wiedär ämol 2000 Johr alt. Diä sind scho übärall.

Nochämnä kurzä Rundgang simmär denn dä Rückwärtswäg aträtä. Äs isch aifach zchalt gsi. Dunnä acho, hämmär no äs letschts Mol üsäs Glück erfahrä. Dä Parkplatz isch scho übärvoll gsi und dLüt händ beraits adä Stross ufä und abä parkiert. Wiedär ämol simmär zur rächtä Ziit am richtigä Ort gsi. Zfriedä simmär di letschtä 4.5 Stund zrugg id Schwiiz gfahrä, i han dAndrea zFribourg abgladä und bin denn spoht am Obäd zWolfhaldä acho.

Frankriichtrip 2/3

Churz nochäm 7i ischäs am nöchschtä Morgä scho losgangä zudä Pont du Gard; äs 2000 Johr alts Äquadukt. Da isch allerding aifacher gsait, wiä gmacht gsi. Mir sind also immär brav dä Schildär gfolgäd und händ denn au dä Parkplatz gfundä. Numä, hetämär 18 Euro Itritt söllä zahlä! Da isch üs aidütig zviel gsi. Also simmär ufdi andär Siitä vom Fluss, zum go luägä, öbs döt andärsch usgeht. Leider isch döt sglichä Untärnehmä gsi und hät wieder 18 Euro verlangt. Zudem händsäs gschafft, dass wiit und brait kai andäri Parkmöglichkeit umä und däzuä alläs abgschottät gsi isch, so dassmär au nöd anä laufä händ chönä.

Mir händ üs denn übärlait, dassmär so ä grossäs Äquadukt gar nöd übärall chan absperrä und sind uf Parkplatz- und Routäsuächi. Fündig wordä simmär denn chli wiitär wäg ufämnä privatä Hotälparkplatz. Wills no früäh am Morgä gsi isch, hämmär üsäs Auto trotzdem döt anä parkiert und sind losmarschiert.

Nochämnä Wili isch dä Wäg immär wenigär zgseh gsi. Allerdings hämmär alti Wandärwägwiisär gfundä, wo zudä Pont du Gard dütät händ. Bevormär mit 18 Euro abzockt wordä isch, hätmär do also mol chönä gmüätlich und gratis anäspaziärä. Undärwägs sind üs denn äs paar Verbotstaflä und ä Abschrankig für Autos begägnät, wommär aifach, mangels Französischkenntnis, ignoriert händ. Dä Wäg hät üs übär Stock und Stai, zwüschäd Räbbä und Oliväbäum und dä kapputtä Wiitärfüährig vom Äquadukt durägfüährt bis kain Wäg meh do gsi isch. Äs hät ächli usgseh wiä bi üs ufdä Alp. Dankäm Telefon simmär aifach immär wiitär Richtig Pont du Gard gloffä und irgändwenn hämmär dä Usblick gha.

Vor üs isch allerdings ä Klippä gsi, so dassmär nöd abä händ chönä. Plötzlich sind üs abär Lüt entgägächo und mir sind aifach denä noglauffä.

Und denn simmär dävor gstandä. Um üs umä häts au andäri Bsuächär gha, allärdings alli mit Audioguide. Näbdäm Äquadukt sind Taflä zudä Entstehigsgschicht gsi mitäm Logo vodem Undärnehmä druf, wo üs vorhär dä Zuägang so schwär gmacht hät. Mir sind also ohni Zahlä zudä Pont du Gard cho. Mi cha so öpis grossäs würkli nöd völlig abschottä. Zfriedä simmär zrugg zum Auto gloffä und sind wiitär noch Nîmes gfahrä.

Willmär am Morgä so früäh losgfahrä sind, ischäs trotz dä Wandärig no nöd ämol Mittag gsi. DSunnä hät üs scho dä ganz Tag beglaität. Jetzt isch abär serscht Mol Feriästimmig ufcho und äs isch richtig warm wordä. Döt wos nöd gwindäd hät, hetämär sogar di churz Hosä chönä bruchä.

Nîmes isch ä härzigs Städtli mit südländischäm Flair. Vo do wäräts au nur no öpä 50 Minutä as Meer abä. Übärall wommär anägloffä sind, isch aifach alläs alt gsi. Äs stönd etlichi Ziitzügniss usäm römischä Riich umä, wo je noch dem meh oder wenigär intakt sind. SMaischte isch aifach mindästäns 2000 Johr alt. Schwäräs Härzäs hämmär Nîmes denn verloh und sind in Nordwestä ufägfahrä.

Dä nöchst Stopp isch la Couvertoirade gsi. Da chlinä Dörfli usäm 11. Johrhundert isch bsundärs, wills niä übär dStadtmuur usgwachsä isch. Drum findätmär do kai neui Hüsär. Ussärhalb vodä Stadtmuur sind numä di altä Höf, Land und Wiesä. Und denn chunt lang nüt meh. SAinzig neuä idä Nöchi isch dä Parkplatz.

SNöchschtä uf üsärä Lischtä isch sViaduc de Millau gsi. Da isch di längst Schrägseilbrugg vodä Wält. Mir sind schnäll drübär gfahrä, händ däbi dä wahsinns Usblick gnossä und händ denn äs paar Fötäli gschossä. DWolkä sind immer dichter wordä, je meh mir in Nordä ufä gfahrä sind. Äs isch abär nomol äs Dörfli uf üsäm Tagäsplan gstandä.

Saint-Cirq-Lapopie isch ä alts Mittälaltärdörfli, wo hoch ufärä Klippä baut wordä isch. Viel meh däzuä zsägä gits aigäntli nöd, äs isch aifach mega härzig, alt und schön. 

Chum simmär denn losgfahrä, häts au scho agfangä tröpflä und rägnä. Mir sind a dem Obäd no uf Uzerche zunnärä Kollegin vodä Andrea gfahrä, wo au Aupair in San Francisco gsi isch. Döt simmär noch viel französisch schwätzä zfriedä is Bett gsunkä und händ Energie für dä nöchschti Tag tankät.

Frankriichtrip 1/3

DAndrea und i sind übär dOstärä am sunnigä Wättär gfolgt und sind diä vier Täg uf Frankriich gangä. Scho am früähnä Morgä simmär ufgstandä und go Schiibä chratzä, damitmär ziitig zFribourg händ chönä abfahrä. Dä erst Stopp isch Annecy gsi, ä chlisäs Städtli ca. ä Stund vodä Gränzä.

DSunnä hät do no nöd rächt wellä usächo. Mir sind denn, bevors alltäglichä Triibä losgangä isch, wiitär gfahrä. Dä nöchscht Stopp isch Glandieu gsi, ä Dörfli mit chum meh als 20 Hüsär im Nirgändwo. 

Abär mitämnä wundärschönä Wassärfall. SNavi hät üs vodä Stross wäg ufän Fäldwäg gführt, wo zmitzt is Dorf inä isch. I han grad ä paar Mol mösä nofrogä, öb da au würkli stimmt. Wo sNavi denn gmaint hät, mir hegäd dä Zielort inä paar Metär ärraicht, simmär no skeptischer wordä. Abär denn händ sich dHüsär gliächtät und mir sind vor dem Wassärfall gtandä. Öb sich do würkli no je än andärä Tourist anävärirrt?

Mir sind denn wiitär in Südä gfahrä und händ bim Palais Idéal in Hauterives än Halt gmacht. Dä Briäfträgär Cheval isch ainäs Tages uf sinnärä Routä übärän schönä Stai gstolpärät und hätän mitgnoh. Noch ganz viel wiitärä Stai und 40 Johr, isch 1912 dä Palst gstandä, wonnär i sinnärä Fraiziit bauä hät. 

Äs isch unmöglich alli Detail zfotographiärä und unmöglich, dassmär da vo Hand bauä chan. Noch viel Stuunä, Glacé ässä und Chartä schriibä, hämmär üs zudä letschtä Etappä ufgmacht: Avignon.

Mir sind schnäll is Hotel go icheckä und denn schnäll id Stadt, solangs nochli häll gsi isch. Dä alt Tail vo Avignon wird no vonnärä völlig intacktä Stadtmuur umgeh. Dinnä ischäs entsprächänd eng, Autos chönd numä a wenigä Ortä anäfahrä. Und zmitzt innä stoht dä riesig Papstpalast. Leider hätär um diä Ziit nümä offä gha. Mir mönd unbädingt nomol do anä cho und dä vo innä gseh. 

Nochäm Umäschlendärä simmär zum Schluss no di berüähmt Pont d'Avignon go aluägä und denn müäd is Bett go pfusä.