Augsburg

Augsburg isch mega härzig gsi. Mir (wiedär ämol numä di komplett Familiä Keller) sind am morgä Früäh zRorschach (bzw. dAndrea zGossau) in Car vo Dähler-Reisen igstigä und sind so richtig Augsburg ufbrochä. Döt simmer zersch ämol mit Zöpfli und Kaffi verwöhnt wordä, so dassmär gar nöd gmärkt händ wiä schnäll Ziit värgangä isch und mir scho voräm Hotel gstandä sind. Döt hämmär üsäs Gepäck abgladä und händ üs zum Wiähnachtsmarkt ufgmacht (wägä dem simmär schliässlich do anä cho!). Dä Markt isch mega härzig ufämnä grossä Platz voräm Rothuus. Zu voller Stund hät denn nöd numä Glockä gschlagä, sondärn grad ein Wiähnachtssong nochäm andärä brocht. Nochdemär dMannä chli gärgärät händ i demmär i jedäs Gschäft go shoppä sind, hämmär denn endli sZimmer bezogä. Döt hämmär allerdings nöd lang Ziit gha, willmär dä Augsburger Knabächor im Dom händ welä go losä, da isch zumindäst i üsäm Plänli gstandä. Allerdings hät dä nöd mitäm Uftrittsplan vom Dom übäraingstummä, so dassmär schlussendli numä dä Augsburger Domchor zghörä übärcho händ, jänu. Däfür simmer denn dur dä belüchtät Wiähnachtsmarkt wiedär zrugg und ab go schlofä. Am nöchschtä Tag isch Sightseeing ufäm Plan gstandä. Nochdemär alli Sehenswürdigkeite durä gha händ, am Idrücklischtä isch do dFuggerei gsi, simmer denn no zwei andäri Wiähnachtmärkt go abklappärä, bevormär müäd und erschöpft und nomol nochärä Ration Punsch zrugg zum Car sind.

wo isch dä Hooggä?

Mir händs wieder haigschafft. Komischerwiis ohni Zwüschäfäll. SIchecke isch ohni Problem verlaufä, mir sind gnuäg früäh döt gsi und sFlugzüg isch rechtziitig abgflogä. ZAmsterdam hämmär zwor no überlait, öbmär churz id Stadt sölläd, da wär denn aber doch ächli knapp wordä. Und wommär schlussendli döt über ä Virtälstund für dSicherheitskontrollä händ mösä astoh, simmär glich ächli froh gsi über dä Entscheid. Nöchschti Feriä: Augsburg :-)

Nyhavn, Tivoli und Co.

Tja, jetzt sind diä Feriä au scho fascht wiedär värbii und mir höcklät grad no sletscht Mol idä baresso. Gescht simmer no di chli Meerjungfrau oder uf dänisch Den lille Havfrue go aluägä, äs Wohrzaichä vo Kopenhagen. Sie gseht aber zimli värfrorä us so ganz ällai ufäm Stai. Drum simmer denn wiiter zum Nyhavn mit sinä vilnä farbigä Hüsli und id Strøget, ä Ichaufsstross. Schlussendli hämmär no dä Tivoli mösä bewundärä, än chlinä Freiziitpark, wo währänd dä Wiähnachtsziit äxtra 2 Millionä Liächtli meh montiärt! Döt hämmär üs mitämnä Gløgg gwärmt und sind wiiter inä Pub mit Livemusig. Und jetzt verbringämär üsi restlich Ziit idä Strøget bevormer an Flughafä mönd. Laidär funktioniert dä online check-in nöd, drum ärwartämär ä Theater wiä zBerlin. Abär mol luägä wiä da wieder usächunt...

København

Nochdemär scho am 20 ab 5i uf dä Zug händ mösä zum üsä Flügär zZüri zvärwütschä, isch üs döt zersch ämol mittailt wordä, dass Amsterdam im Moment wägä dichtem Näbäl nöd agflogä wärdä cha. Mir sind also wieder usä zum irgändwo go noschlofä. Plötzlich isch dä letscht Ufruäf für üsä Flug cho. Mir händ üsi Sachä packt und sind dur sganze System wieder durägrennt (Londonstyle), dä Flüger isch abär scho wäg gsi. Döt hämmär abär ärfahrä, dassmär aigäntli eh scho umbuächät wordä sind und üsä Flug scho am 7i gsi wär. Numä händ mir vo all dem überhaupt nüt gwüsst! Schlussenli simmer denn uf än Direktflug ufdi 12i umbuächäd wordä und händ so wenigschtäns numä 3 Stund verlorä - und dä Tino hät au sin langärsehntä Burger übercho ;-)
Kopenhagen isch däfür mega härzig. Äs gseht us wiä St. Gallä idä Multergass, numä mit meh Backstai und viel farbiger. Am Obed, wommer acho sind, ischäs sogar wärmer gsi wiä idä Schwiz, hüt goht abär än mega chaltä Wind, so dassmär jetzt scho ä Pausä händ mösä ileggä...

Antalya

Quad fahrä isch super gsi. Fascht ächli zwenig Action für üsä Gschmack, abär üsi Klaidär händ do ä andäri Sproch gredät. Uf all Fäll isch mis T-shirt meh bru als gäl gsi :-)
Am nöchschtä Tag hämmär üs denn amänä gfüärtä Gruppäusflug probiert. Dodäbi simmer zwor uf Antalya cho und händ ä orientalischi Show gnossä, isch aber nöd so üsä Fall. Dä Tag isch meh us Car fahrä bestandä, so dassmär wärtvolli Bruwerdziit värlorä händ. Alläs i alläm aber doch sehr luschtig gsi, dÄrfahrig, dass dMannä besser Buchtanzä chönd hät sich uf all Fäll glohnt!

Gold Island, Avsallar

Mir händ wiedär ämol Feriä nötig gha, drum hämmär üs id Südtürkei ufgmacht :-) Jetzt sitzämär bi agnehmä 28 Grad am 20 ab 10i adä Bar und nutzäds All inclusive us. Mol luägä öbmär morn usämögäd zum go Quad fahrä...

Paris

Will üs Städteraise grad so gfallä händ und willmär über eboutic.ch günstigi Tickets fürs Disneyland übercho händ, simmär grad nomol id Feriä; dasmol uf Paris. DStadt hät üs wiedär ämol mit offänä Armä empfangä. SWättär het nöd bessär chönä si (vilicht ächli wenigär warm), sHotel isch grad bidä Sacré-coeur und bim Moulin Rouge gsi und zudä Metrostation hämmär au nöd wiit gha. SDisneyland hät allnä meh oder wenigär gfallä, Paris by night isch aber genial gsi. Zum Schluss simmär denn no schnäll uf dä Eiffelturm klättärät (jo, mir sind ufä gloffä!) bevormär üs, nochämnä ganz churzä Träffä mitäm Hugo, dasmol früähziitig, zum Flughafä ufgmacht händ. Paris isch aifach jedäs Mol wiedär schön...

"L" zum Dritten: London

I hans endli übär dNochborländär usgschafft (Australiä usgnoh) und bin 3 Täg zLondon gsi. S'Wättär hät laidär nöd so mitgspielt, mir händ nöd aimol Rägä gha. Am erschtä Tag (und ziitwiis am letschtä) hät sogar dSunnä gschunnä! ;-) Sus isch London super gsi. Üsäs Hotel isch direkt bim Hyde Park gsi, so dassmär döt zersch ämol dAichhörnli sind go bsuächä. Dä Buckingham Palace, dä Big Ben mit Regiärigsgebäude, viel Brugge und no meh händ natürli au nöd dörfä fählä. Und denn isch sShoppä losgangä... Im Harrods hämmär laidär numä sÄssä värmögä bzw. dä Räscht simmer schnäll abgloffä zum us därä Menschämassä wiedär usäzcho. Drum simmer denn uf di andärä Strossä usgwichä. Fazit: London isch ä mega cooli Stadt mit schönä Bautä und gaaaaanz viiiiiel Ichaufsmöglichkaitä. Zum Schluss hämmär üs denn natürli no ufs Gleis 9 3/4 mösä begeh. Da isch laidär numä so ä chlisäs Tail mitämnä Chäräli wo id Wand goht. Mir hetät mindästäns ärwartät, dassäs ufäm Perron wär, abär äbä... Und da ischäs dennn au gsi vo London; mir händ üs gmüätlich zum Flughafä ufgmacht -- hämmär gmaint. Dä Gatwick Express isch denn abär nöd wiä agnoh all Virtälstund gfahrä, sondärn numä all Halbi. So simmär denn ersch ca. 8 Minutä bevor sGate schlüsst am Flughafä acho. S'End vo üsäm Londontrip isch denn dodrus bestandä dassmär grennt sind wiä no niä i üsäm Läbä. Mir händ dä halb Flughafä i öppä 5 Minutä durchquärt und sind 2 Minutä bevors Gate schlüsst scho dur dSicherheitskontrollä gsi. Nochdems dAndrea denn im Ailtempo no gfilzt händ, simmer wiiter grennt, numä zum erfahrä, dass Easy Jet Verspötig hät... Ou man, wenigstäns simmär so denn di ganzä agfressänä Kalloriä vo Fish & Chips ect. loswordä und sind denn au fascht di erschtä gsi wo händ chönä istigä. Übrigens: Mir händ denn no übär ä Stund gwartät bismär abgflogä sind.

Locarno

Gescht isch Kurzferiä agsait gsi, d.h. ain Tag Tessin :-) Mir sind über Chur und Bellinzona uf Locarno go bädälä. SWasser isch härrlich gsi, im Gägäsatz zum Bodäsee richtig warm. Noch ä paar Stund adä Sunnä, hämmär üs imänä Restaurant direkt am Lago Maggiore verköstigät und sind denn über Domodossola, Brig und Bern wiedär zruggkehrt. Super Usflug gsi, für Erholig brüchts aber doch ächli meh, also; what's next?

Luzern

Gescht ischäs aidütig tschö gsi zum Lärnä. Zumindäst dinnä im Zimmer. Drum hani sGA und sLärnzüg gschnappät und bin am Nomi schnäll uf Luzern an Vierwaldstättersee gangä. Döt hani, noch dä obligatä Durchschrittig ;-) vodä Brugg, ä gmüätlichs Plätzli am See gsuächt. Wärädäm läsä und bädälä bini denn immär wiedär vo chlinä Schwän undärbrochä wordä, wo glaubs gmaint hend i heg öbis zÄssä. Uf all Fäll händs wiä wild umäquitscht. Tja, und denn hani au scho wiedär dä 3-stündig Haiwäg aträtä mösä...

Kurztrip noch Rom

Di letschtä 2 Täg simmär zRom gsi, bzw. ich und dä Tino sind 2 Täg blibä, dä Rest vodä Familie häts Romprogramm i aim Tag absolviert ;-) SWättär isch super gsi. Am Morgä no schön chüäl, am Nomi hämmär üs denn aber än chlinä Sunnäbrand igfangä. Rom isch mega interessant. Egal wommär anälauft, stoht irgändwas mega alts. Und zwor nöd aifach so äs bitzli alt, sondern richtig antik; 2000 Johr alt isch irgändwiä Standard. Sus isch Rom rächt übersichtlich. Äs git numä 2 U-Bahn-Liniä und äs isch fascht alläs zFuäss ärraichbar. Am Mittwoch isch denn ä Stadtrundfahrt mitäm Bus agsait gsi, mit demmär denn sColosseum, dä Vatikan usw. erraicht händ. Ich und dä Tino sind denn is Hotel, wo numä ä paar Schritt vom Colosseum entfernt gsi isch und händ üs nochärä agnehmä Duschi zudä spanischä Träppä ufgmacht, wommär denn auch Znacht gässä händ. Am Donnschtig simmär denn no sColosseum vo innä go betrachtä, händ dä Bocca della Verità no schnäll agluägät und sind denn idä Via del Corso go shoppä mitämnä churzä Zwüschästop bim Trevibrunnä. Alläs i alläm isch Rom ä mega schöni Stadt mit richtig kitschigäm italienischem Charme, wommär gärn wiedär ämol bsuächät.

Sassa

Hüt simmär nochäm Markt zCecina go Sassa aluägä. Das isch ä ganz ä chlisäs Dörfli, wo vilicht 2 Mol im Johr än Tourist zgseh überchunt. Sus gits do drübär gar nüt zverzellä, äs hät nämli aifach nüt döt. Däfür gits ä super Ussicht über dHügel vodä Toscana und typisch italienischi Gässli.

wolkig aber warm

Jetzt simmär scho äs paar Tägli zItaliä. Fazit: Äs isch zwor warm, aber äs chunt immer mol wiedär go rägnä, wa ainärsits rächt schad isch, anderersits aber vo Vortail fürs Lärnä isch, da mir jo bald Prüäfigä händ. Bis jetzt häts abär jedä Tag glangät, zum mindästäns aimol go bädälä und a allnä Märt (2) wommär bisher gsi sind, isch au immär guäts Wättär gsi. Bru werämär vilicht nöd so fescht wiä au scho, abär mir gnüssäts Meer, dä Strand und Glacé trotzdem :-D

Toscana :-)

Bald ischäs so wiit, di nöchschtä Feriä stönd bevor! Nur no

und es kam alles anders...

Tja, anstatt dassmär aifach üsi Koffär am Flughafä icheckt händ, ischäs ächli andärsch värlaufä. Irgändwiä isch da nämli wedär übärs Internet, no am Chaschtä, no am Schaltär gangä. Noch langäm hi und här, hät denn mol aini vodä airberlin gmärkt, dassmär gar nöd glistät sind und üsä Rückflug ersch am 18. MÄRZ anstatt am 18. Februar wär. Und willmär sowieso scho Ziit värlorä, umbuächä mösä händ und dä Flug am Obäd no tüürär cho wär, hämmär di nöchscht Maschinä noch Züri gno. So isch laidär nüt meh drus wordä, zum nomol id Stadt zgo:-(

Brandenburger Tor

Gescht hämmär üs uf dä Wäg zum Potsdamer Platz gmacht. Döt isch währädäm chaltä Chriäg dMuur durä gangä und isch bis sie abbrochä wordä isch, praktisch nöd gnutzt wordä und immär no vom 2. Wältchriäg zerstört gsi. Hüt isch dä Platz mega modern. Mi gseht aigätnli nüt meh vodä altä Architektur. Mir sind denn dä Stross bzw. dä Muur nogloffä bis zum Brandäburger Tor, mit Zwüschähalt bim jüdischä Denkmol, und äm Raichstag. Dänno simmär asä verfrorä gsi, dassmär üs im KaDeWe versteckt händ... :-)
Jetzt sind diä Feriä au scho wiedär umä und mir mönd üs beraits zum Flughafä ufmachä. Nochär gits abär nomol än churzä Abstächär id Stadt, zum sletschtä Gäld usgeh.

Alexanderplatz

Gescht hämmär beschlossä üs inän Touristätourbus zetzä und so än Übärblick übär dStadt zärhaltä, blödi Idee gsi, abär dodäzu nochär... Mir sind denn öpä bidä Hälfti vodä Tour bim Alexanderplatz usgstigä. Döt simmär uf dä Fernsehturm vo wo mär ä mega Ussicht übär Berlin hät. Nochdemmär irgändwenn usägfundä händ, dass sich dUssichtsetage nöd drait und numä sRestaurant, simmär denn ad Bar ghöcklät und händ chli dStadt übärblickt. Nochär hämmär natürli no dä Alexanderplatz gnau undär dLupä gno und sind dä Berliner Dom go aluägä. Schlussendli simmär endli wiedär in Tourbus zrug. Dä isch denn au ganz schön brav und holterig wiitergfahrä, hät üs denn abär undärmnä Vorwand, dass dä nöchscht Bus i 5 Minutä chäm, am Hauptbahnhof usägworfä. Nur; dä isch niä uftaucht. Und drum hämmär zwor für ä ganzi Tour zahlt, abär nöd di ganz gseh:-S Jänu, trotzdem luschtig gsi.
Hüt simmär denn, zum üs vom Sightseeing zerholä, in Designer Outlet gangä.

Checkpoint Charlie

Mir sind gescht endli uf Berlin gflogä. Am Flughafä acho hämmär sofort dä Bus und dU-Bahn gno und sind zudä Feriäwohnig gfahrä. Döt hämmär denn au dä Schlüssäl übärcho und sind i üsäs Zimmär izogä. Isch mega härzig do. Obwohl da Huus vo ussä meega alt und nümä ufäm neustä Stand usgseht, isch dinnä alläs schön neu renorviert und mega härzig igrichtät.
Dä erst Tag Berlin isch jetzt au scho fascht värbi, äs fählt numä no dä gmüätlich Valentins-Kino-Obäd :-) Hüt simmär dFridärichsstross go ablaufä, wo dur dä Checkpoint Charlie, also dur dBerliner Muur i zwai Tail trennt wordä isch. Äs isch zwor irsinnig chalt gsi, voralläm häts immär so chalt zogä, mir händ üs abär im Haus am Checkpoint Charlie (Mauermuseum) verwiilt. Am halbi 4i häts denn au mol Zmittag geh für üs und jetzt wartämär nur no druf dass dä Znacht färtig wird...