DRea raist um dWält: Australien & Japan

Grad rächtziitig ufs grossä Sylvester-Füürwärk isch dAndrea zSydney acho. In Australiä hät sie bis im März dä Spotsummär gnossä und isch denn uf Japan go dä Früählig bewundärä. Värcherti Johresziitä-Raihäfolg!

Australien 28.12.1015 - 24.3.2016

Japan 24.3.-3.5.2016

Otoyo - Yakush

Hirosh - Hokkai

USA 2016

Afang Juni hämmär üs entschlossä Ziit intensiv znutzä, nöd schlofä und alläs go entdeckä wammär chönd. Drum simmär für 10 Täg id USA gflogä. In Los Angeles acho, hät mi und dä Tino än gmainsamä Studiäkolleg, dä Dani, vom Flughafä abgholt und mir sind direkt wiiter dä Küstä no noch San Diego gfahrä. Untärwägs hämmär no dä Sunnäundärgang am La Jolla Beach gnossä, bevormär im Hostel acho sind.

Am nöchschtä Tag simmär in San Diego Zoo gangä. Dä isch riesig und hät sogar ä Sailbähli zum vom aintä zum andärä End zcho. Und natürlich ganz noch Amerikanischer Art än Shuttlebus, damitmär jo nöd muä laufä. Da händ mir abär trotzdem gmacht und händ ganz viel fuuli Tier bewundärät.

Denn isch üsän Roadtrip richtig losgangä und zwor zersch Mol in Joshua Tree National Park. Döt hämmär grad au dä erscht Hitzeshock erlittä. In San Diego ischäs no agnehmi 23 Grad gsi. Bidä Joshua Trees scho übär 30. Abär dä Park hät sich glohnt. Dä isch us irgändämnä Grund touristisch nöd so übärloffä und biätät abär, näbst dä speziällä Bäum, Oasä und Kakteäfäldär.

Noch ä paar Stund Fahrt simmär zfriedä go schlofä und händ üs am früähnä Morgä zum Grand Canyon ufgmacht. Döt simmär denn grad au ufdä Bright Angel Trail gstartät wo abä in Grand Canyon führt. Abä ischäs änart no guät gangä, obwohls immär haissär wordä isch. Dunnä simmär denn scho ziemli am Schwitzä gsi und händ dä nöchscht Hitzeschock verdaut. Damol hämmär scho 40 Grad gha. Ufä ischäs denn entsprechänd idä Mittagssummä nümä so agnehm gsi. Zum Glück hämmär viel Wasser däbi gha, wo mit jedäm Schluck chli liächtär wordä isch und noch vielnä Pausä und zuähnehmändä Höhämetär isch sKlima denn au wiedär chli chüälär wordä.

Ziit zum Usruäbä hämmär abär nöd gha und sind direkt no 4 Stund zu üsäm nöchschtä Ziel gfahrä: zum Havasupai Indianergebiät. Nochärä sehr churzä Nacht im Schlofsack ufäm Parkplatzbodä, hömmär am Morgä am 4i scho wiedär mösä ufstoh. Mir sind erneut in Grand Canyon abägloffä zum die mega schönä und fascht scho kitschigä Wassärfäll im Indianergebiet azluägä. Aigäntli het üs dä Spass gemäss Internet 35 Dollar söllä choschtä. Abär dunnä acho, händs vo üs je 88 Dollar verlangt, willmär Tagestouristä sind. Tja, noch 16 km und 3:45 wandärä, hämmär nöd aifach wiedär wellä umcherä und händ dä Priis zähneknirschänd zahlt. Wenigstäns händ sich dWassärfäll würkli glohnt. Und ä supär Abchüälig sinds au gsi. Am spotä Nomi hämmär üs denn ufdä Rückwäg gmacht und sind mit allärletschtär Chraft churz voräm Sunnäundärgang noch 11 Stund laufä und 43 km zrugg bim Parkplatz aglangt. Völlig färtig simmär denn zum Motel gfahrä, wommär noch denä zwai astrengändä Täg aifach mol gschlofä händ.

Mit Muskälkatär a allnä Stellä simmär denn au am nöchschtä Tag ufgwacht und händ üs nochärä Stärkig am Zmorgäbuffet is Auto gsetzt. Hüt hämmär numä ai Ziel gha: üs möglichscht wenig zbewegä und noch Las Vegas cho. Än chlinä Zwüschästopp hämmär denn abär glich no bim Hoover Dam iglait. ZLas Vegas hämmär denn soffizielle Foti am Las Vegas Sign gmacht und sind denn zersch mol im Hotel an Pool. Am Obäd hämmär üs denn no amänä mega Burger gstärkt, damitmär diä verloränä Kaloriä vodä letschtä Täg wiedär dinnä gha händ.

Mit frischär Energie ischäs denn is Death Valley gangä. Alläs wammär bis jetzt a Hitz gwöhnt gsi sind, hät da Tal übärtroffä. Mir händ ä Hitzewällä verwütscht und äs sind meh als 50 Grad gsi. Noch numä ainärä Minutä dussä, simmär ämlich scho so übärhitzt gsi, dassmär am liäbstä inän chaltä See inäghüpft und niä meh usä cho wäräd. Abär so ainä isch natürli wiit und brait nöd zgseh gsi. SDeath Valley isch ä Wüästi wiämmär sich vorstellt (mit ä bitz wenigär Sand und meh Stai). Trotdem ischäs scho rächt iidrücklich, dass amnä sottigä Ort Lüt gläbt händ, wos no kai Klimaalag geh hät.

Noch numä ai Stund Fahrt usäm Death Valley usä, hät sich dLandschaft scho wiedär völlig värändärät und dTemperaturä sind dütlich abä. Churz voräm Igang zum Yosemite National Park hämmär imänä mega schönä Motel übärnachtät und sind am nöchschtä Morgä scho wiedär am 4i ufgstandä. Dasmol nöd zum go wandärä, sondärn zum än begehrtä Platz ufäm Camp 4 im Yosemite Valley zergattärä. Will alläs scho monatelang usbuächät gsi isch, isch da üsig ainzig Hoffnig gsi, will mär dä Zältplatz nöd reservierä cha und aifach uf guät Glück värbii go muäs. SIntärnet hät üs ainigi Hiwiis gliefärät, dassmär würkli au scho früäh döt stoh müänd. Nochärä 2 stündigä Fahrt, simmär am 7i scho acho und händ üs inä beraits mega langi Schlangä igraiht. Denn isch sBibbärä losgangä. Sie händ knapp 80 Plätz zvergeh gha und mir sind doch scho rächt wiit hinä gstandä. Fall idä Raihä also no äs paar Lüt für andäri reserviert händ, denn hetämär kai Chance gha. Mir sind denn abär mit dä Plätz 69-71 grad no so drigrutscht. Ufäm Campingplatz simmär noch därä Wartärai abär ersch am Mittag am 12i gsi. Am Nomi simmär denn dä Yosemite Lower Fall go aluägä, wommär 2014 scho gseh händ, und händ üs denn ä grooossi Pizza gönnt.

Üsä Muskälkatär isch mittlärwiilä wiedär ghailt gsi und mir händ üs drum ufdi nöchscht Wandärig gwogät. Dasmol simmär dä Mist Trail bis zum Nevada Fall ufäglaufä. Dä Wäg hät sin Namä würkli värdient. Är führt a drü Wassärfäll värbii, wobi mer ordäntlich nass wird. Näbädäm Vernal Fall sogar richtig pflutschnass. Mir händ abär au grad di best Johresziit värwütscht und dFäll händ dankäm Schmelzwassär richtig viel Wassär gha. Zrugg im Camp hämmär äs grossäs Füür gmacht und ä Grillparty veranstaltät, wommär alläs drufgschmissä händ, wammär im Supermarkt so gfundä händ. Zu üs händ sich no zwai Norwegär gsellt, wommär än Tag vorhär bim Astoh troffä händ. So isch denn au scho dä letscht Obäd für mi värbi gsi.

Am nöchschtä Morgä hämmär üsi Zält abbrochä und sind zum Glacier Point gfahrä, zum nomol di supär Ussicht im Yosemite National Park zgnüssä. Denn ischäs numä no noch San Francisco gangä. Döt händ mit dä Tino und dä Daniel am Flughafä abgladä und sind denn wiitär in Yellow Stone gfahrä. I bi per Zuäfall amänä Economy Plus Sitz zuägwiesä wordä und bin mit viel Baifraihait zrugg id Schwiiz gflogä.