Alpäübärquärig: Ilanz - Lumbrein - Terrihütte

Beraits im April simmär wiitär uf üsärä Wandärig noch Como glaufä. Drum simmär bi schönschtäm Wättär uf Ilanz gfahrä und händ üs uf dä Wäg gmacht. Värschiedäni chlini Strössli händ üs wiit ufä gführt, so dassmär i chürzästä Ziit wiedär händ chönä ufs Tal abäluägä.

Nochämnä churzä Zmiitag ufämnä Bänkli ischäs denn au scho wiitär gangä. DStrössli händ sich langsam mit Wandärwäg abgwächslät und denn simmär noch 19.5 km, 1'251 positivä Höhämetär und 5 Stund 23 Minutä au scho zLumbrein acho.

Wiä letscht Johr hät denn sWartä agfangä. Obä innä häts no lang Schnee gha und au spoth nomol geh, so dassmär ersch Ende Juli di nöchscht Etappä händ chönä machä. Di 11. Etappä het vorgseh, dassmär vo Lumbrein grad id Terrihütte laufäd. Mir sind abär scho am Obäd vorhär 6.6 km, 286 positivi Höhämetär und 1 Stund 44 Minutä uf Vrin gloffä und händ döt im Hotel Péz Terri sensationell guät gässä und gschlofä.

Am nöchschtä Morgä simmär bi supär Wättär gstartät und händ zersch ämol sehr viel Höhämetär hindär üs brocht bevormär ufäm Pass Diesrut üsä wohlvärdiänt Zmittag gnossä händ.

Ufäm Pass obä häts gluftät und äs sind immär meh Wolkä ufzogä, so dassmär schnäll wiitär Richtig Terrihüttä gloffä sind, wommär denn noch 11.3 km, 1'162 positivä Höhämetär und 5Stund 7 Minutä acho sind. 

SWättär isch döt au scho wiedär bessär gsi und mir händ dä Nomi dussä adä Sunnä chönä gnüssä, bevors am Obäd idä SAC-Hüttä än fainä Znacht geh hät und mir müäd igschlofä sind.

Zwüschästand: 196.6 km, 11'928 Höhämetär+, 64h 22min

Südengland

Händär schomol imänä Pilcherfilm di schönä und kitschigä Landschaftä bestunt? Die sind ächt! Mir sind döt gsi und chönds bestätigä:

Mir händ slangä Uffahrtwuchäend gnutzt und sind beraits scho am Zischtig Obäd uf England gflogä, wommär zersch ämol imänä Pub übärnachtät händ. Nochdemär üs ä Auto gschnappt und üs an Linksverkehr gwöhnt händ, isch üsi Schlössli- und Küstätour losgangä. Dä Clou a därä ganzä Sach: SMami und dä Papi händ kai Ahnig gha, wohi dass goht (obwohls Südengland värmuätät händ). Erschtä Stopp: Arundel Castle, wo au hüt no bewohnt isch.

Als Kontrast däzuä simmär denn Titchfield Abbey go aluägä, wo numä no dFassadä ainigärmassä stoht und hüt voralläm vo Jugändlichä als Spiel- und Klätärplatz gnutzt wird.

Mit Grillierzügs und Dessert bewaffnät, simmär is airbnb-Hüsli Mittä im Wald izogä, wommär nochämnä usgibigä Znacht zfridä igschlofä sind. Am nöchschtä Tag isch snöchschtä Schlössli ufdä Listä gstandä: Lulworth Castlä. Da isch 1929 laidär völlig usbrennt. DMuurä stönd no vollständig, innädra isch abär alläs zerstört wordä.

Nochdem ischäs serscht Mol adi wundärschö Küstä gangä, wommär usgibig gfötälät, gstunt, Glacé gässä und aifach numä sWättär gnossä händ.

Zum Abschluss vom Tag häts in Abbotsbury än typisch englischä Tee (= Kaffi mit Kuächä) geh und mir händ döt dä natürlich Strandwall us Chiesälstai bestunt, wo sich kilometerlang adä Jurassic Coast entlang ziäht. SMami hät natürli ä paar Souvenir für ihri Balkonsammlig mitgno. Laidär simmär für dSwanery scho tspoht dra gsi, so dassmär kai chlini Schwän meh händ chönä go aluägä.

Am nöchschtä Tag hämmär denn dKüstä scho wiedär mösä verloh und sind Richtig London gfahrä. Unterwägs häts Zmittag und än Zwüschästopp in Wells geh, wommär nöd numä sStädtli sondärn au di riisig Kathedralä bestunt händ.

Agäntli wär a dem Tag no Highclere Castle, dä Drehort vo Downtown Abbey ufäm Programm gstandä. Laidär hät diä usgrächnät a dem Tag zuä gha, sodassmär diräkt uf London gangä sind und üsi airbnb-Wohnig zmitst i Westminster idä nöchi vom Big Ben bezogä händ. Dä letscht Tag hämmär denn mit viel laufä und Metro fahrä i därä Stadt verbrocht und ganz viel Sachä bestunt und entdeckt, bevormär am Uffahrtssunntig wiedär haigflogä sind.

Alpäübärquärig: Elm - Flims - Ilanz

Im Oktober 2016 hämmär üs adi letschtä zwai Etappä gwogät, bevor dä Schnee cho isch. Am 1. Oktober simmär drum vo Elm mit üsärä 8. Etappä gstartät. Zum uf Flims cho, hämmär zersch ämol dä 2'627m hoch Segnespass mösä passiärä, üsä höchscht Pass ufdä Alpäübärquärig.

Dobä acho, simmär abär mitärä supär Ussicht belohnt wordä. Wägäm chaltä Luft, hämmär sie nöd lang chönä gnüssä und sind schnäll am Martinsloch värbii i di gschützt Ebni abägloffä, wos scho wiedär ainigäs wärmär gsi isch.

Denn ischäs numä no bärgab gangä, däfür abär no sehr wiit. Völlig kaputt und mit dä letschtä Chräft simmär denn noch 17.5 km, 1'650 positivä Höhämetär und 7 Stund 57 Minutä zFlims acho. Diä Wandärig isch mega schön, abär au sehr lang gsi.

Vier Wuchä spötär häts dobä scho Schnee gha. Mir händ dä schö Herbsttag abär usgnutzt und sind ufdi 9. Etappä vo Flims uf Ilanz abä gstartät. Im Gägäsatz zu vorhär, ischäs do ainigäs gmüätlichär zuä und här gangä. DEtappä sälbär isch auf viel chürzär gsi. Mir händ viel Ziit gha zum Pausä und Fötäli vom Caumasee machä und händ a dem wundärschönä Herbsttag alli Sunnästrahlä igfangä.

Nochämnä gmüätlichä Wäg idä Rhischlucht simmär denn noch 18.6 km und dasmol numä 365 positivä Höhämeter i 4 Stund 51 Minutä zügig zIlanz acho und händ üs döt no ä Glacé gönnt. Noch därä Etappä hämmär beraits scho dHälfti vo üsärä Alpäübärquärig uf Como gschafft.

Zwüschästand: 159.1 km, 9'229 Höhämetär+, 52h 08min

Malaysia, Thailand & Singapur

Mir sind Endi Februar go Asiä entdeckä und uf Singapur gflogä. Döt simmär abär grad numä ai Nacht blibä und grad wiitär noch Malaysia gangä. Nochdemär üs mitäm Auto im Linksverkehr igwöhnt händ, simmär denn au scho in Kuala Lumpur acho.

Noch ä paar intärässantä Täg i därä Stadt und i dem Land, simmär churzärhand noch Krabi in Thailand gflogä, zum üsi Wintärblaichi abzlegä. Näbäd bädälä, simmär döt natürli au mitäm Böötli go Inslä und Stränd aluägä.

Zrugg in Malysia ischäs wiitär in Nationalpark gangä. Tier hämmär laidär nöd viel gseh. Äs isch üs numä ain Aff, än Vogäl und än Tuusigfüässlär übär dä Wäg gloffä. Däfür hämmär nochämnä sehr haissä Aastiig ä supär Ussicht gnossä.

Zur Abchüälig simmär denn id Höchi id Cameron Highlands gfahrä. Döt werd Tee abaut und diä Hügäl gsehnd wäg dem chüälärä Klima mega kitschig grüä us.

Noch vielnä Kurvä ischäs wiedär abä id Wärmi und ad Westküstä vo Malaysia gangä. Döt hämmär üsäs Auto wiedär abgeh und händ George Town erkundät. Am nöchschtä Tag simmär mit dä Fährä uf Langkawi gfahrä, wommär nomol dä Strand und dInslä gnossä händ.

Denn simmär au scho zrugg uf Singapur gflogä, wommär endli Ziit gha händ, zum dStadt aluägä. Zersch hämmär im Pan Pacific Hotel idä Marina Bay icheckt und händ denn di letschtä 4 Täg gnossä.