Bereits am 22. Mai hämmär üs ufdi 2. Etappä ufgmacht. Allerdings hämmär scho im Vorus gwüsst, dassäs numä ä halbi Etappä geh wird, wills aifach no zviel Schnee im Alpstai gha hät. Also ischäs a dem Tag numä bis uf Brülisau, anstatt id Staubärä gangä.
Mir händ wiedär supär Wättär värwütscht und sind gmüätlich uf Wiissbad adä Sittärä nogloffä.
Churz nochäm Wiisbad hämmär di erschtä und ainzigä Höhämetär in Agriff gno.
Am Mittag simmär noch därä astrengändä Wandärig zBrülisau acho und sind nochämnä fainä Ässä wiedär hai gfahrä. Und denn hämmär zersch ämol mössä wartä. Dä Summärafang häts nöd äso guät gmaint. Nochdem dä Schnee endli gschmolzä isch, isch au sguäti Wättär värbii gsi und äs hät so ziemli jedäs Wuchäend grägnät. Wos denn endli wiedär bessär wordä isch, abär nöd grad alli Ziit gha händ, hämmär üs churzerhand uftailt. I und dä Tino sind am 17. Juli wiitärgloffä. SMami und dä Papi händ üs am 30. Juli igholt.
Willmär bim letschtä Mol numä ä halbi Etappä gmacht händ, simmär dasmol halt ainähalb gloffä. Grad scho am Afang ischäs ufä in Ruähsitz gangä, wos denn au di erscht Pausä geh hät. Denn simmär näbädäm hochä Chaschtä ufdä Kamm ufägloffä und händ di schö Ussicht ufd Appäzällär und dSt. Galler Siitä gnossä.
Idä Staubärä häts denn än früähnä Zmittag geh, bevormär übär dSaxärluckä in Mutschäsattäl ufägloffä sind und di letschtä Höhämetär vom Tag hindär üs brocht händ. Do obä häts nomol än Rast geh und mir händ wiedär ä supär Ussicht gha.
Bis do anä isch alläs glatt gloffä. Jetzt hämmär üs abär mösä ufän laaaangä Abstiig gfasst machä. Zwüschätinnä händ üs no ä Chuäh wo dHüähnär abgschläckät hät und vorwitzigi Gaissä abglenkt.
Und denn simmär nochämnä sehr langä Tag zWildhus unnä und definitiv im Kanton St. Gallä acho. Dä Muskälkatär hät sich bereits bemerkbar gmacht und am nöchschtä Tag hät kainä vo üs meh chönä normal laufä.
Abär äs hät sich glohnt. Etappä 2 & 3 hämmär mit 27km, 1'770 positivä Höhämetär i 9 Stund 25 min bi supär Wättär gschafft und viel neui Sachä ärläbt.
Zwüschästand: 51.6km, 2'904 Höhämetär+, 16h 13min
0 Kommentare:
Kommentar veröffentlichen